ORANJESTAD (AAN): Zr.Ms. Friesland un biaha mas a intercepta un transporte di droga den Lama Caribe.
Despues di un persecusion, e barco di Marina a confisca un cantidad grandi di cocaina. Esey a sosode dia 14 di juni, pero ta te diaranson esaki a keda anuncia.
E accion a cuminsa na momento cu a mira un boto sospechoso riba radar. Zr.Ms. Friesland a tuma accion. E barco di stacion a lansa e botonan FRISC, cu ta botonan rapido di intercepcion, den lama, y a cuminsa cu e persecusion. Esey a sosode hunto cu helicopter di Wardacosta Mericano. Abordo di e botonan rapido di intercepcion tabatin ekiponan di tripulacion combina di e barco mes y di Wardacosta Mericano.
Boto ‘Go fast’ mester a stop
E asina yama ‘go-fast’ a nenga di stop despues di diferente advertencia. Durante un persecusion riesgoso, e boto cu droga a eherce maniobranan evasivo. Esnan abordo di e boto ey ademas a saca pakete for di e boto benta den laman. Cu tironan dirigi riba e boto for di e helicopter, finalmente a logra cu e boto a bin para. Un total di 10 pakete di cocaina e keda saca for di laman, un total di 511 kilo.
Operacionnan anti-droga
Zr.Ms. Friesland for di fin di mei ta e barco cu ta staciona den Region Caribe. Operacionnan anti-droga ta parti di e tareanan di e barco. Den esaki Zr. Ms. Friesland ta opera hunto cu Wardacosta Mericano y tambe Wardacosta Region Caribe. Ademas e barco ta para cla pa brinda yudansa humanitario, por ehempel durante desasternan natural, manera un horcan.
