Migracion a duna prueba cu mama ta un so tin pero cu por tin hopi tata
- Tatanan cu ta entrega mundo yiu na dozijn ta dificil pa controla
- E famoso cantica cu tur hende ta bira ruman, a bira panico mundial
ORANJESTAD(AAN) Uno di e diferencianan mas grandi y conoci entre homber y muher, den e epoca actual moderno a bira topico internacional.
Manera ta conoci, avance di ciencia a trece cune, cu un dama cu kier bira mama pero tin un pareha cu pa motibo di fayonan di naturaleza no por contribui den e proceso natural, por haci uzo di e produccion di materia prima di hombernan cu ta entrega esaki na asina yama “banconan di inseminacion”.
Trafico den e otro direccion pues di solucion di problema di muher cu no por bira mama, ta exigi otro base cientifico.
“Inseminacion Artificial” manera e procedura medico ta wordo yama ta basta tempo conoci pero problemanan serio cu e por produci, a haci cu hopi clinica ya e trata na cera porta pa loke e produccion artificial di un ser humano, ta crea.
Den pasado recien, DIARIO a presenta ya e relato di parti di mundo medico, cu a realisa cu bay contra naturaleza tin problema serio. Esaki sigur ta e caso ora ta trata di reemplaza naturalesa cu tecnicanan moderno cu ta habri porta pe situacionnan hopi problematico pa e ser humano.
Uno di e peligernan di creacion artificial di hende ta, cu e hende cu ta wordo produci no semper por bolbe den su historia y evita cu na e otro banda di mundo, e ta uni cu su propio ruman cu tambe a nace den laboratorio pero sin cu nan mes ta na haltura.
Despues di tempo ta resulta awor, cu e hecho cu stranheronan tambe por bende nan articulo pa produccion humano, hende a perde hopi control riba relacionnan familiar.
Den un cantidad creciente di caso, ta imposibel pa hende realmente sa si e amigo cu el a topa na otro banda di mundo, no ta yiu di su tata tambe cu a dicidi di bende su produccion natural di yiu cu un laboratorio.
Si e hende por topa cu puntonan comun di su tata y su mama na mes instituto di creacion artificial di hende, e por haya algun informacion cu por pone mas luz riba su inicio di bida.
Den hopi caso, sinembargo, e mama ta conoci pero e tata ta keda un persona desconoci pa semper.
Esaki pa e simpel motibo cu e homber por tin centenares di yiu na cantidad di pais, sin cu e mes sa cu ta su yiu pasobra ta via banco di inseminacion artificial, negoshi pa produci un ser humano a tuma lugar.
Pa basta tempo tin clinica pues cu ta rechaza stranheronan den nan negoshi di inseminacion artificial, pero awor alarma a wordo bati a base di e migracion mundial fuerte cu ta haci cu tatanan despues di a produci dozijn di yiu, ta desaparece for di mapa .
E dicha cu mama tin un so pero cu tata tin hopi, den temponan moderno ta haya un contenido real.
Pa evita problema serio pues pa futuro generacionnan, ya tin banconan di fertilidad, manera e centronan pa produccion humano sin relacion humano, ta wordo yama, cu no ta acepta stranhero como donor di paternidad na generacionnan nobo.
Gyneacologonan Hulandes no kier tuma ningun riesgo y kier awor un banco nacional Hulandes, cu na un forma optimal por entrega yiunan cu un mama cu no tin un esposo fertil, e oportunidad pa nace di un mama cu no ta produci un yiu cu centenares di ruman, cu e no sa cu ta su ruman.
E forma pa cuminsa atende cu e problema mas serio na e momentonan aki ta pues, pa cera porta pa stranheronan directamente of pa medio di importacion di nan simia, yuda den e produccion di ser humano.
Expertonan ta pensa cu den futuro tin basta homber na cada pais pa yuda den e produccion nacional di e materia cu ta haci un homber tata pa asina evita un explosion di e cantidad di hende cu por ta tata di un solo ser humano.
Un situacion hopi serio si considera cu segun cientificonan un solo homber por controbui cu miles y miles di yiu na un poblacion caminda su identidad ta keda secreto pasobra e ta un stranhero.
Pa evita problema for di 2018 na Hulanda tin e regla cu un homber solamente por contribui a forma artificial den produccion di un maximo 12 familia. Pero con un homber, sigur cu un nacionalidad stranhero ta multiplica humanidad den exterior, ta keda e pregunta y e problema, cu DIARIO lo sigui vigila pa presenta descubrimentonan moderno cu ta confirma cu nos grandinan tabata tin razon den hopi pensamento cu a bira dicho y proverbio, cu actualmente ta bira conocemento cientifico.
Mientrastanto te awor ta bini dilanti cu mama ta uno so tin, pero cu tata por tin hopi. Cuanto tempo esaki por wordo considera ainda, ta na discusion teniendo na cuenta awor e desaroyonan den laboratorio y clinicanan caminda muher kier duna prueba cu nan tambe kier competi den e careda artificial contra naturaleza, cu na su turno ta crea preguntanan serio cu ya den hopi seno importante, ta wordo cuestiona!
