Yuda bo yiu controla su rabia

Rabia no ta algo facil pa un mucha maneha. Mas chikito nan ta mas dificil e ta pa nan pa maneha e rabia.

Door cu e muchanan no sa con pa canalisa of controla nan rabia, muchanan por explota y bira histerico. Den un momento di rabia e muchanan por cuminsa grita, kibra obheto, tira obheto, dal of insulta. E ta un emocion cu no semper ta negativo. Ta bon pa tin biaha ta rabia, paso nan por siña di dje. P’esey como mayor mester por purba yuda nos muchanan controla nan rabia, pa asina nan siña expresa y canalisa nan rabia sin haci daño na su mes of na otro. 

Con por yuda bo yiu controla su rabia:

• Mantene bo mes calmo

Como mayor bo mester duna ehempel, maske e mucha ta histerico purba di tene pasenshi y mas calmo posibel 

• Siña e mucha reconoce e rabia

Den e momento di rabia ta hopi dificil pa por dialoga cu un mucha, pero despues por papia tocante e situacion, dicon, kico a bay fout, con por actua miho den otro situacion y con e ta sinti su mes awo 

• Siña e mucha actua sin rabia

Mayoria mucha cu ta haya ataca di rabia ta paso nan falta habilidad pa actua di otro manera, nan no sa con pa soluciona e problema. 

Pa yudanan cu esaki nos ta : 

- identifica kico a causa e rabia

- yud’e pa bin cu solucion pa futuro situacionan

- splic’e kico ta pasa ora bo reacciona cu rabia y ora bo reacciona mas trankilo 

- apoya bo yiu ora su reaccion no ta rabia 

• Yud’e expresa su rabia

Lag’e haci algun actividad cu e por explora su emocionan, por ehempel: pinta, scirbi y traha dibuho 

• Siñ’e libera tension

Deporte ta un bon manera pa bo yiu libera tension, canalisa stress y rabia, e ta traha ‘endorfina’ y e ta contribui pa sinti mas miho. Otro acitividadnan cu ta libera tension ta actividadnan cu ta enfoca riba relahacion. Por ehempel: Yoga. 

• Desaroya strategianan di control propio

Splic’e kico ta consisti bou di control propio, por ehempel: “no reacciona malo ora bo tempo di wak television a caba” 

• Stimula empatia

E ta dificil pa e muchanan haci esaki, door cu e ta implica cu e muchanan mester por compronde otro y purba ta den e sapato di otro. Pero e ta algo necesario pa purba stimula esaki den e bida di un mucha for di un edad jong.                                                        

Kico como mayor no mester haci ora bo yiu ta rabia:

• Dun’e loke e kier, paso bo kier pa e no rabia cu bo of bira histerico
• Culp’e : lag’e sa cu esaki ta un emocion normal, pero cu e tin cu siña controla
• No haci uzo di intercambio: esaki ta bon pa yud’e desaroya un bon comunicacion, pero e no ta sirbi pa controla rabia 

3 frase cu por yuda bo yiu maneha su rabia:

• “Mi por ripara cu bo ta rabia.”
• “Bo por ta rabia, pero no ta na su lugar pa kibra cos, grita, haci daño na bo mes of otro persona.”
• “Bo por ta rabia cu bo ruman, paso e la kita bo co’i hunga faborito. Bo por bis’e cu bo ta rabia pero sin dal e, paso e no ta permiti.” 

Por busca diferente buki cu ta bay tocante di rabia, esaki tambe lo yuda e muchanan. 

Algun di nan: 

“ Cool down and work through anger”- Cheri J. Meiners

“ When I feel angry” - Cornelia Maude Spelman

“ Ik ben boos” - Irene Heim 

“ Kleine vulkaantjes”- Warwick Pudney & Eliane Whitehouse

“ La rabieta de Julieta” - Steve Antony 

“ Gaston esta furioso”- Sophie Furlaud

Tambe por haya algun buki na biblioteca Nacional Aruba.

Fuente: https://www.guiainfantil.com/educacion/conducta/la-ira-en-los-ninos-es-una-de-las-emociones-mas-temidas-por-los-padres/

Pa informacion of pregunta por acerca Fundacion Pa Nos Muchanan - Cumana 2