Yrausquin a entrega 5 Freightliner truck nobo pa Tropical Bottling Company

ORANJESTAD (AAN): Diabierna atardi, DIARIO tabata presente na sede di Tropical Bottling Company na Balashi,

pa observa e momento cu e agencia local di Yrausquin a haci entrega oficial di 5 truck nobo di marca Freightliner.

   E entrega oficial di e trucknan nobo aki, pinta tur den colornan cora bibo cu emblema di Coca-Cola y Balashi, tabata un momento special pa tanto Cristina Yrausquin como tambe Orol y Marcela di e agencia local.

   Cristina a splica cu Yrausquin ta un compania di famia, y nan pasion ta e mundo automotriz.  Y pesey awor el a duna bon bini na Tropical Bottling Company na e famia di Yrausquin.  E ta ademas na vispera di e hecho cu e agencia ta celebrando su di 70 aniversario como dealer di auto y truck, cu parts department, service department, y bodyshop tambe.  Awor ta e di tercer generacion di famia ta manehando e negoshi.

   E negociacion pa busca 5 truck a cuminza como un aña pasa.  Y el a desemboca den e entrega oficial.

   Jason Brown di ITC a expresa su gratitud na gerencia y staf di Tropical Bottling y tambe di Yrausquin, y special na Marcela.  El a bisa cu escogiendo e marca Freightliner, e ta un truck cu por depende riba dje, e no ta costa hopi pa mantene, y tin un linea directo cu no djis cu e dealer na Aruba, sino cu e distribuidor ITC tambe.

   Brown a bin Aruba pa asina nan por duna e chauffeurnan un training con ta core cu e vehiculonan aki, pa nan sa con e sistema di Freightliners moderno ta funciona, y con pa core nan safe.

   Carlos Tapias di Tropical Bottling Company tambe a expresa nan satisfaccion cu nan tin e trucknan nobo aki.  Como 11 luna pasa nan a cuminza busca forma pa busca trucks nobo pa e compania.  A dura un tiki debi na dificultadnan cu supply-chains na Merca.  Pero awor si nan a yega Aruba y ta cla pa core riba caya.

   A busca e trucknan aki, pasobra e compania a nota un crecimento significante den benta y distribucion di productonan, y mester di mas equipo pa reparti productonan riba Aruba.  Ora di a busca Truck nobo, nan a enfatiza riba e disponibilidad facil di pieza, y esey ta un exigencia critico.  Nan sa cu Freightliners ta confiable y bon truck, y nan a haya input di mecaniconan tambe den escogencia.

   Gerencia Eddy de Veer di Meta Corp tambe a dirigi palabra y a gradici tur hende di Tropical Bottling Company y Yrausquin pa haci esaki posible.