DVG cu algun conseho pa evita Dengue
ORANJESTAD (AAN): Den e dianan cu a pasa y den e lunanan cu ta sigui, Aruba lo por sigui experencia basta yobida. Algun ta mira esaki como un bendicion, pero e por ta tambe inicio di un menasa pa salud publico, si como poblacion nos no ta conciente y traha hunto pa minimalisa e risico di malesanan transmiti pa sangura.
Manera ta conoci, sangura mester di awa pa por buta su webonan. Mas awa keda para rond di cas despues di yobida, mas oportunidad e sangura tin pa broei dentro di 8-10 dia.
Pa por minimalisa e risico cu Aruba por bay experencia un brote di Dengue manera varios otro pais den Latino America, ta importante pa nos tur hunto ataca e problematica for di su raiz. Esaki ta ensera reduci of stop e sangura di sigui broei na cantidad grandi. Esaki nos por haci door di:
- Tira afo of warda tur obheto cu por retene awa innesesariamente paden y rond di cas, scol, trabou y alrededor dibo. Por ehempel scoter bou mata, tire, coy hunga pafo, vas cu mata of flor y mas
- Tapa tur awa para cu tin proposito manera e.o pa muha mata of duna bestia tur dia. Por ehempel hemchi bou erco of bari cu awa di yobida y mas
- Ta extra alerta riba awa para cu proposito di bida pa mata of mascota por ehempel vas cu mata of flor, baki awa di bestia, vijver cu mata di lili y mas
Di dos (2) paso ta proteha bo mes pa bo no haña Dengue, esaki bo por haci door di:
- Bisti paña cu manga y pia largo durante oranan di atardi pa anochi
- Uza repelente contra sangura riba cuero cu no ta cubri cu paña
- Den espacio pafo di cas cende un mecha of uza bela contra sangura
- Sera porta y bentana di cas prome cu bira scur of uza screen
- Evita di bishita areanan unda bo ta conciente cu tin hopi sangura
- Spuit paden di cas, camber, oficina y areanan cu bo ta frecuenta regularmente cu producto pa mata sangura.
Di tres (3) paso ta proteha otronan rond dibo ora cu bo tin Dengue of tin sintomanan di Dengue. Esaki bo ta haci door di evita di wordo pica pa sangura. E sintomanan di Dengue ta entre otro:
- Keintura
- Dolor di cabes
- Biramento di stoma y sacamento
- Dolor di weso, joins y musculo
- Dolor di wowo
- Rash riba curpa
Si bo ta presenta e sintomanan aki, consulta bo dokter di cas.
