YMCA Aruba ta introduciendo e proyecto di “Meaningful Work”

ORANJESTAD (AAN): Na aña 1956, Bob Steel a funda e organisacion di Young Men´s Christian Association Aruba (YMCA).

E obhetivo desde cuminsamento ta pa aporta na e bienestar fisico, intelectual y spiritual di muchanan cu hobennan den comunidad.

             Door di cultiva nan potencial ta posibel pa contribui na e desaroyo di nan confiansa y respeto propio pa asina nan por bira miembronan ehemplar di nan famia y sociedad. E YMCA di Aruba ta promoviendo e obhetivo aki cu diferente programanan ofreci specificamente cu curso- y campamentonan pero ademas un traimerdia yama Y’s Care.

            Actualmente e organisacion ta conta cu mas di 110 participante den ambos centro di Dakota y San Nicolas cu ta forma parti di e traimerdia. E Vision Nobo Pa 2030, e organisacion global di YMCA a establece un vision nobo caminda cada centro rond di mundo lo enfoca pa ta riba e mesun direccion tocante diferente topico importante.

             Esaki ta trata di e 4 pilarnan entre otro: Community and Wellbeing First, a Sustainable Planet, a Just World y Meaningful Future of Work. Cada un di esaki ta conta cu puntonan cu lo desea di incorpora den e servicionan brinda di cada centro durante e proximo añanan.

            Den e forma aki YMCA lo por stimula un mihor desaroyo di comunidad y hobennan pa nan por bira futuro lidernan. Proyecto ‘Meaningful Work’ Considerando e vision nobo, YMCA Aruba ta introduciendo e proyecto di “Meaningful Work” cu lo envolve e participantenan di e traimerdia Y’s Care di ambos centro na Aruba.

            Esaki lo tuma lugar riba 26, 27, 28 di mei y lo finalisa riba 2 di juni, 2023. E proyecto ta encera cu e participantenan lo haci trabou voluntario cerca diferente organisacion na Aruba entre otro: Fundacion Pa Nos Comunidad, Scubble Bubbles, Cas Marie, Luna Foundation, Nine Lives Foundation, Fundacion Cas di mi Chepa y Donkey Sanctuary.

            Danki na nan cooperacion, YMCA Aruba lo por educa e participantenan tocante e balor di duna un man na e comunidad. Na otro banda ta importante pa remarca cu e proyecto aki ta patrocina cu e fondonan di LAKA.

            Ademas YMCA Aruba ta sumamente agradecido cu e contribucion valioso di sponsornan pa asegura cu e participantenan lo tin un bon experiencia durante e transcurso di e proyecto.

            Finalmente, ta aprecia y reconoce e aporte di e organisacionnan hunto cu e staff di YMCA pa asegura e ehecucion di ‘Meaningful Work’. Ta spera cu por a informa y conta cu e apoyo di e comunidad di Aruba pa cu e proyecto aki.