Yerba invasivo di lama ta pushando un tipo di jellyfish di islanan ABC pa busca otro lugar

Segun Universidad di Wageningen

ORANJESTAD (AAN): Investigadornan di Wageningen University & Research, y tambe Universidad di Amsterdam a descubri algo inusual!  Esta un sorto di ‘guera’ cu ta tumando lugar entre un mata invasivo, cu awor ta competi cu un jellyfish indigeno di e islanan Aruba, Bonaire, y Curaçao.

   E especie di yerba di lama ‘Halophila stipulacea’ ta hopi exitoso den colonizacion di areanan nobo den Lama Mediteraneo y den Caribe.

   E yerba di lama aki por plama debi cu hopi fragmento chikito ta kibra y kita afo, e por keda na bida hopi tempo largo, asina ta drief cu coriente di lama y yega areanan nobo.

   Den un recien publica rapport titula ‘Batthe for themounds: Niche competition between upside-down jellyfish and invasive seagrass’ den revistanan cientifico Ecology, y tambe den Nature Today, cientificonan a describi con nan a descubri cu e yerba di lama invasivo ta usa serito chikito (cu bestia ta coba manera cabaron of lol’i awa ta traha) como punto di salida pa crece den areanan nobo.  E seritonan aki ta ofrece espacio y claridad, un ambiente ideal pa e yerba di lama.

   For di eynan e mata invasivo por plama atravez di e cama di yerba di lama.

   Lugarnan halto cu claridad ta hopi gusta: Pero e investigadornan a descubrí cu esaki por ocasiona problema tambe pa especienan indigeno.

   Aki ta papia di e upside-down Jellyfish, cu e.o. na Curaçao ta conoci como ‘Kimakima’, y tin e nomber cientifico ‘Cassiopea xamacahana’.

   E jellyfish kimakima aki ta enberdad ‘ariba abao’, y e ta drumi riba su lomba, pasobra tin alga fotosintetico den su tenglanan. Pesey e jellyfish akí tin mester di claridad tambe, y nan gusta permanece na lugarnan habrí, manera e seritonan sin nada riba nan.  Esey ta loke e investigador Fee Smulders a bisa, kende ta cerca di obtene su titulo como doctor na Wageningen University & Research y kende ta e autor principal di e investigacion aki.

   Durante algun tempo e studiante pa Master of Science, esta Naomi Slikboer a sigui e seritonan aki, y el a nota presencia di tanto e jellyfish kimakima como e yerba di laman invasivo na Curaçao.  El a descubri cu na cuminzamento tabatin hopi jellyfish kimakima riba e seritonan, pero cu na final mayoria di e seritonan a transforma y na final ta djis yerba di laman invasivo ta crece riba nan.

   Jellyfish Kimakima ta muda mas biaha: Pa motibo di yegada di e yerba di laman, e kimakimanan mester muda mas biaha y posibelmente nan ta perde nan habitat.  Mas aleu e investigadornan ta pensa cu e interaccion entre e yerba di laman invasivo y e seritonan lo percura pa un cama di yerba di laman dinamico y instabil, loke ta desventahoso pa e yerba di laman indígeno balioso.

   Aki e investigador Smulders a bisa: “Ta importante pa vigila e especie exotico akí bon y investigá su influencia riba tanto e especienan indigeno como riba henter e paisahe bao di lama.”

   E texto aki traha door di Wageningen Environmental Research, y e potretnan pa cortesia di Erik Wurz.