Yegada di Miss Aruba Thessaly Zimmerman

ORANJESTAD (AAN): Emocionnan tabata halto den VIP Room di Aeropuerto mientras esnan presente tabata warda yegada di Miss Aruba, Thessaly Zimmerman, kende awo ta conoci como un di e 10 muher mas bunita di mundo.

Manera semper, Thessaly tabatin un sonrisa grandi y tabata hopi feliz di por a braza su mayornan y rumannan, como tambe su amigonan. Minister di Cultura, Xiomara Maduro, Anoutcka Koolman-Burleson (National Director di Miss Aruba) y Susanita Diaz-Maduro di Organizacion local Star Promotion, como tambe señora Maureen Leenheer- Vieira, di cuatro finalista di Miss Universe na 1974 tambe tabata presente pa ricibi Thessaly.

Minister Maduro a indica cu den nomber di Gobierno, e ta hopi contento di por a ricibi Thessaly y nan ta sumamente orguyoso di su logro na Israel, den un certamen importante den mundo di beyeza, na unda nos representante a sa di briya entre e 80 participantenan. Minister a bisa cu asina cu nan a anuncia cu Aruba tabata entre e 16 finalista, esey ya caba tabata un orguyo grandi, pero ora Thessaly tabata entre e 10 finalista, "nos curazon tabata den rementa" di emocion. Minister a gradici Thessaly pa su tremendo trabao na Israel, mirando cu esaki tabata un responsabilidad grandi y su preparacion prome cu e certamen sigur tabata hopi duro, pero Thessaly a mustra di ta un persona cu hopi disciplina y sigur amor di su famia, cu a dune tur apoyo.  

Thessaly a gradici e apoyo cu el a haya pa sali entre e 10 muhernan mas bunita y inteligente di mundo, muhernan empodera y disciplina, pasobra esey ta necesario pa logra sali den e top 10. El a bira cu e trabao tabata hopi duro pero el a hacie cu hopi orguyo, pasobra riba tarima e no tabata para como 'Thessaly Zimmerman' sino como Aruba. El a conta cu el a keda den shock ora el a scucha Aruba den e top 16 den celebracion di 70 aniversario di Miss Universe.