Habitantenan di Noord y Palm Beach ta desespera
- Pensionadonan no sa mas unda pa busca yudansa
ORANJESTAD (AAN): Ta masha poco biaha bo ta ricibi asina hopi reclamo tras di otro riba un solo topico. Pero e informe publica Dialuna den DIARIO encuanto molester inmenso y doloroso di Motociclistanan manehando motorycle di potencia halto, y ta keda revv motor, a hala hopi atencion.
Loke a pasa den fin di siman a referi na un situacion cu diferente grupo di turistanan a pasa den dje, den cercania di Highrise Hotelnan, conoci como “Hotzone”. Varios hoben coriendo rond cu nan motorcyclenan modifica, cu extended swingarm na e wiel patras, ta core rond y keda revv e motor sin stop, ocasionando un molester di otro mundo, y spantando e yiunan chikito di e turistanan canando den Palm Beach.
E motociclistanan hoben ta djis para riba caminda, y keda ‘kima taira’ pa traha donut cu nan motorcycle riba caminda (circulo cu nan wiel), y keda revv motor ocasionando boroto di otro mundo. Anto net den area turistico, unda nan ta laga un sabor amargo cerca tur bishitante. Pa colmo e kimamento di taira aki ta produci un huma cu un holor sofocante, y esaki tambe por a mira con turistanan ta tene nanishi cera.
Molester enorme na Noord: Tabata asombroso pa mira cuanto reaccion a drenta riba e pida noticia aki, y principalmente di ciudadanonan cu ta biba na area di Noord cerca di Palm Beach, den e zona di e Rotonde di Noord bay pabao.
Un di e ciudadanonan a identifica su mes como pensionado, y e señor aki a expresa con desapunta nan ta cu autoridadnan local ta haciendo nada pa garantiza trankilidad di poblacion den oranan di marduga.
Nan ta mustra cu den e zona residencial aki, tin Clubnan Nocturno cu den siman ta keda habri te cu 3:00 am, y den fin di siman ta keda habri te 5:00 am. Ta parce cu ni Polis, ni Departamento di Asuntonan Huridico, ni Asuntonan Economico no ta ni pensa un rato riba habitantenan den e area aki, tempo cu a duna e negoshinan aki un Koffiehuisvergunning cu ta laga nan keda habri te casi oranan di mainta.
Despues cu e motorcyclenan aki cla cu negoshinan dilanti Highrise Hotel, nan ta mobilisa marduga pa e sector aki di Noord pa Palm Beach, creando desordo cu ta spierta nan tur for di soño! Tur esaki ta pone cu varios bisiña ta sufriendo di apnea di drumimento, y ta na man di Docter pa esaki.
“Ya nos no por mas cu e molester di brommernan,” ta loke e pensionado a splica. Fuera di esey e sonido ‘bass’ cu ta keda bati constant den bo cabez procedente di e Club Nocturno, tin ciudadanonan disgusta, desampara, y hasta perdiendo confiansa cu Gobierno a lubida completamente riba nan.
Nan a yega di raporta esaki hopi biaha na autoridad, pero ta sinti cu nada ta wordo haci. E motociclistanan ta mira Polis, y nan tur ta core bay para den rij na Snacktruck actuando comosifuera nan ta cumprando algo, siendo cu nan no tin ni plan pa cumpra cuminda e ora ey.
Habitantenan ta haci un suplica na Ministerio Publico pa busca den buki di Ley pa mira kico por haci pa asina garantiza mas trankilidad di e habitantenan di e sector aki. Pasobra e bisiñanan mes ya no sa mas kico pa haci. Y nan ta sigui perde nan soño tur anochi y marduga!
