Ya caba artistanan ta pintando e muralnan nobo pa Artweek Aruba 2022

Mas bunita arte na San Nicolas

ORANJESTAD (AAN): Director di ArtisA, esta Tito Bolivar a indica cu tur cos ta bayendo biento en popa preparando pa diferente actividad cu tin planea pa tuma lugar na San Nicolas e simannan venidero, relaciona cu e Artweek Aruba 2022.

   E siman aki mes, nan a lanza oficialmente e proyecto di ’50 Steps of Rodgers Beach” door di Ban Mosaik y ArtisA pa Artweek.  Esnan na Aruba cu tin experiencia di traha cu mosaico, por contact Tito Bolivar na 593-4475 y tur dia di 2:00 pm pa 10:00 pm ta trahando riba e stepnan, pa asina dia 3 di November nan bay pega esaki na Rodgers Beach su trapi.

   Esey lo ta e antesala pa e Artweek 2022.  Lo bay tin diferente artista internacional cu ta na Aruba caba, pa bay crea bunita mural riba murayanan na San Nicolas.

   Artweek Aruba 2022 lo tin dia 31 di October lo tin workshops gratis.  Dia 1 di November lo bay tin ‘Art Talk’ cu lo ta live riba social media, pa siña mas con e artistanan internacional a bira popular.  Dia 2 di November lo bay tin Art Fashion, unda e biaha aki lo dedica riba cambio climatico, y lo tin 11 diseñador, di cual uno di nan ta un marca.  Lo tin diseñador di Curaçao y Bonaire tambe, y uno di nan cu ta ‘Mala Mucha’ lo bay lanza un creacion nobo durante Art Fashion na Aruba, cu lo ta riba Promenade na San Nicolas.

   Aki ta mira cu Aruba Art Fashion ya caba ta birando e lugar unda diseñadornan grandi ta busca forma pa bay expone nan creacion, y expone nan creatividad nobo.  Atelier Dorier di Suriname tambe ta bin cu algun pieza sublime y bunita.  Poco poco San Nicolas ta bira e cas di moda.

   Dianan 4, 5, y 6 di November lo bay tin e di cinco aña cu ta celebra Aruba Art Fair.  E biaha aki tin 80 artista local y internacional cu ta desplega nan arte.  Lo bay tin poesia, musica, cuminda, cantamento, exposicion cultural, pop-up fine dining restaurant di Divi, y tambe Kulture Kafe.  Diasabra lo bay tin un Parada Cultural tambe den e Aruba Art Fair.

   Si bo kier mira e artistanan (incluyendo uno di Taiwan) pintando e muralnan, bo por pasa tur dia na San Nicolas y admira con nan ta haciendo e trabao.