Vision di Betico Croes pa autonomia financiero ta realidad na 2024
*Na 1983 Aruba a exigi di Reino su Banco Central y moneda propio
*Progreso di Florin mester ta garantisa den eleccion nacional 2024
ORANJESTAD (AAN) — Na 2026 Aruba lo celebra cu 40 aña pasa, e lucha dirigi pa Betico Croes a bira realidad y Aruba a ricibi su Status Aparte.
No tabata trata aki solamente di un cambio estatal, pero di cambio cu lo a entrega Aruba e formula pa un autonomia real.
Dos punto tabata central den e lucha cu tabata Husticia cu mester a duna seguridad cu e Arubiano no por wordo persigui legalmente sin base den un sistema di Husticia central represivo, cu lo por a stroba e Arubiano busca su derecho.
E exigencia aki a conduci na e Ministerio Publico di Aruba.
Reparticion di bienes tabata e otro factor importante. E lucha encabeza pa Betico Croes a inclui, e autoridad propio di Aruba pa dicidi kico ta pasa cu placa di belasting di Pueblo di Aruba, cu mester a duna e garantia di sirbi e bienestar di e pais mescos cu tur otro produccion financiero di Aruba.
E florin Arubano mester a sigura cu Aruba lo no a bira victima mal maneho y circumstancianan naci na otro partinan di Reino.
E maneho di Florin Arubano a wordo pone den man di e Banco Central di Aruba cu asina a dirigi e factor mas importante di e calidad di bida di e Arubano.
Na 2026, ora Aruba celebra cuarenta aña di logro di realizacion di su Status Aparte, e proximo Gobierno despues di eleccion 2025, mester por duna Pueblo di Aruba y mundo e siguranza, di continuacion di e maneho financiero spectacular di Ministro di Finanza, Xiomara Maduro.
Ora Aruba bay eleccion na December 2024, e ta habri porta pa celebracionnan di 40 aña Status Aparte, loke ta entrega un aspecto politico sumamente importante cu te awor ta haya poco atencion.
Aruba a drenta su Status Aparte na momentonan sumamente dramatico, ora ciere di Lago a wordo utiliza pa e constructornan real di Status Aparte no ta den gobernacion di Aruba.
Contrario na otro islanan den Reino Hulandes, Aruba no a ricibi ningun asistencia financiero di Hulanda pa e por a drenta su epoca di Status Aparte. Aruba, diferente na e otro paisnan Caribense den Reino, no a ricibi e asistencia financiero pa deshaci di nan debe nacional.
Salido di Lago a trece cambio den e panorama politico loke a haci cu e maneho di e pais manera diseña pa Betico Croes, consehero di e ultimo Bestuurscollege di Aruba, no a bira realidad.
Bienestar di e Florin Arubano tabata central den e bataya pa Status Aparte pa e simpel motibo cu solamente un Florin Arubano fuerte, por a duna garantia di autonomia na e pais.
Ya na salida di Status Aparte, e hipotecanan cu a wordo duna dor di e prome Gobierno di Aruba, a exigi Hulanda interferi na e pais nobo, Aruba, cu mester a adapta su maneho.
E exigencia Hulandes pa un Florin solido ta basa riba e realidad cu sin un moneda solido, un pais ta directamente na peliger.
Kico ta pasa cu un pais ora su moneda perde balor, ta visibel por ehempel na Venezuela, caminda Bolivar no tin ningun balor mas cu tur resultado pa su poblacion.
Pa Betico Croes tabata sumamente importante, pa e moneda di Aruba no wordo comparti cu otro paisnan pa evita cu mal maneho na otro paisnan den Reino, por destrui e bienestar di Aruba.
Awe e maneho di Gabinete Evelyn Wever-Croes den cual e firmeza profesional di Ministro di Finanza, e experto mr. Xiomara Maduro, ta bini dilanti, ta entrega Aruba un florin fuerte, debi na e hecho cu Aruba tin un presupuesto, den cual su gastonan por wordo cubri cu su entradanan.
Esaki ta haci cu hasta cu e peso di e debe nacional cu Aruba mester paga como herencia di Gobierno Mike Eman, hunto cu e peso di proyectonan PPP produci tambe pa Gobierno Mike Eman, no por stroba Aruba di tin un situacion financiero den cual e entradanan di Aruba ta sigura cu e ta cumpli cu su gastonan basico.
Esaki pues ta garantisa na e pais, un situacion financiero solido di Aruba, cu ta prepara pa celebra 40 aña di su Status Aparte na 2026.
Sin duda por relaciona e ansia grandi di tanto partido pa ta na mando na Aruba den preparacion pa celebra e fiesta di 40 aña Status Aparte na 2026.
Sinembargo, futuro di Aruba atrobe ta depende di e maneho cu ta wordo hiba y den cual mester tene na bista situacionnan mundial y inespera cu por presenta.
Hecho ta cu pa eleccion 2024, Gobierno Wever-Croes ta entrega na Aruba un Florin fortifica, cu ta e motibo cu Reino ta pidi continuacion di e maneho actual.
Sin duda, Ministro Xiomara Maduro a honra e base di e lucha pa Status Aparte di Betico Croes, den cual libertad di maneho financiero y monetario cu un propio Florin y Banco Central, ta entrega Aruba awe un recuperacion milagroso den Reino!
.
