Desaroyonan mundial importante ta exigi ampliacion di tema politico
*Inversion den industria nobo pa yuda hende pone fin na nan bida
*Cuanto hende no ta enfrenta morto, pero ta sobrebibi y keda bibo?
ORANJESTAD (AAN) —Tur loke tuma lugar, pues tur suceso, ta resultado di loke a wordo permiti.
Continuamente por tuma nota di critica riba desaroyonan riba tur tereno, pero poco biaha e critica ta acompaña pa e motibonan cu tur loke ta pasa, por a bira realidad.
Uno di e topiconan mundial awe, sigur ta duna motibo pa reflexion serio, pasobra e ta atende cu uno di e dramanan humano mas grandi cu mundo moderno por conoce.
Ora papia di mundo moderno, ta papia di un mundo di suspuesto adelanto como resultado di logronan di hende riba tanto tereno.
Antes e luna na cielo tabata duna motibo pa tur tipo di interpretacion. Awor cu hende a gasta sumanan enorme pa biaha y cera conoci cu luna aparentemente hende tin problema pa atende cu problemanan den su propio cas.
E temanan actual mas importante di mundo cu ta consisti di ser humano mester atende, ta trata hustamente kico ta pasa cu e ser humano y kico bida ta nifica pa hende.
Maneho di hende, maneho di comunidadnan, segun democracia mester ta basa riba bienestar di hende.
Pa esaki, loke realmente ta directamente di importancia pa hende, mester haya tur atencion.
Pa DIARIO como matutino di Aruba, esaki sigur ta conta tambe y pesey mester cuminsa bati alarma pa atende cu peligronan cu ta afecta hubentud y peligronan nobo cu mundo ta conoce.
Con ta bay atende cu e topico mas importante pa hende cu ta su derecho di nace, derecho di bida y manera awor a bira topico, hasta su derecho pa muri?
Temanan di interes directo pa hende pero cu ta wordo poni un banda supuestamente pasobra nan ta personal, pero ta bira decisivo hustamente pa e peliger cu nan ta nifica pa decisionnan personal di demasiado hende.
Na e momento aki, e noticia mundial importante ta, cu awor tin un sistema completamente nobo, un ramo nobo di compania, pa hende por pone fin na nan bida.
Kico esaki ta nifica? Kico nos leynan ta bisa di suicidio? Kende ta duna certeza di ki dia hende ta muri? Cuanto hende ta enfrenta morto, pero ta sobrebibi y ta keda bibo mientras otro ta muri den accidente?
Suicidio ta uno di e temanan cu mester haya atencion sigur si mira e diferente aspectonan cu e tin.
Negoshinan nobo ta habri pa yuda hende mata nan curpa. Na paisnan manera Hulanda cu ta parti di Reino Hulandes, e tema aki ta uno comun y e personanan cu gana placa cu morto di otro, ta bay prison.
Pero na mes momento por mira con e oportunidad pa hende comete suicidio ta aumenta.
E hora a yega pa cuminsa atende cu e topiconan aki y na lugar di sensacion, cuminza atende e asuntonan cu base profesional.
Na Hulanda un dokter riba peticion di un patient por yuda un hende pone fin na su bida, si e pidi esaki y tin prueba cu e hende lo no recupera.
Pero esaki ainda ta keda cu un pregunta. Kende por bisa cu aki no por abusa di ocasion?
Den nos mundo moderno tin cantidad di topico cu mester haya atencion serio y den esaki sigur e calidad di bida pero tambe e motibo cu hende kier pone fin na nan bida.
Inversionnan ta wordo haci den formulanan nobo pa hende pone fin na su bida. Mientrastanto mester di inversion pa atende cu e realidad espantoso di un aumento enorme di mucha cu no kier bida mas y ta intenta suicidio.
Muchanan cu den e mundo cu ta aplaudi desaroyo cientifico, no por entrega ni mucha loke e mucha merece pa enbez di pensa con e ta pon fin na su bida, e soña cu logronan cu e por alcanza.
Hende ta central na planeta Tera. Ta bira tempo pa e hende ta realmente central no solamente pa e forma cu e por yuda riba tereno material, pero debi na e balor cu e tin como hende.
Mester duna definicion na tur loke ta atende cu hende. No alarga bida di un persona na un forma artificial ta diferente for di mata un hende, alegando cu e no kier biba mas.
Ta increibel cu hende mester discuti ainda e balor di bida di hende, cu ta hoga den cambio di mentalidad sano, cu ta hasta hancra den e ley politico di democracia, cu ta pone hende y su felicidad central.
