ORANJESTAD (AAN): Cu e yegada di Roxanne-Liana Francisca como manager nobo pa e programa di Wereld Natuur Fonds (WWF-NL),
e organizacion ta amplia su enfoke den Caribe. Francisca lo tin e responsabilidad pa logra metanan di conservacion den Caribe Hulandes y pa fortalece colaboracion pa proteha naturaleza den henter region Caribense.
Impacto regional: Desde aña 1960, WWF-NL ta activo den conservacion di naturaleza den Caribe Hulandes. Den e añanan anterior, e enfoke principal tabata pa crea ecosistemanan di costa cu ta resiliente pa cambio di clima y proteha animalnan marino iconico manera bayena, dolfijn, turtuga y tribon. Pero e menazanan cu e seis isla ta enfrenta, no ta stop na e frontera di e paisnan. Otro isla y paisnan den e region tambe ta enfrenta retonan similar. door di combina e experiencia di oficinanan regional di WWF den paisnan manera Colombia, Belize, Guatemala, Honduras, Mexico, Suriname y Guyana cu Caribe Hulandes y cu e red internacional di WWF, por haci un impacto mas grandi. Francisca lo tin un rol importante pa crea un brug entre conservacion den Caribe Hulandes cu e region mas amplio. Esaki lo contribui na restauracion di biodiversidad y un futuro sostenibel pa hende y naturaleza.
Procedente di Curaçao: Roxanne-Liana Francisca, naci na Curaçao, no ta un nomber nobo den mundo di conservacion. Mas cu siete aña, el a traha na Stinapa Bonaire como biologo marino, Senior Conservation Manager y manager di Washington Slagbaai National Park. E tin hopi experiencia cu proyectonan grandi di conservacion y el a custumbra traha cu diferente organizacion. cu su experiencia y conocemento balioso, e por fortalece e programa di WWF-NL den Caribe.
Roxanne-Liana Francisca aki a declara: “Mi ta hopi contento pa por join e team di WWF-NL y mi ta entusiasma cu mi por contribui na trabao di conservacion importante den Caribe Hulandes. Ademas, mi kier yuda logra resultadonan tangibel y duradero cu lo beneficia no solamente e islanan, pero tambe e region mas amplio.”
