Wowo di Horcan Beryl categoria 5 a pasa panort di Aruba

Varios beach a wordo afecta

*Na Aruba lama tabata bruto cu olanan halto

*Ta keda monitor efectonan di rabo 

ORANJESTAD (AAN):   Siguiendo e desaroyo di e pasada di Horcan Beryl cerca di e islanan ABC, por bisa cu esaki a causa basta daño na islanan bisiña den Caribe, manera Grenada caminda hopi cas a keda destrui.

            Pa loke ta manece di diamars, Aruba no a haya indicacion di ningun awacero local. Tampoco esey a sosode merdia. Loke si por a constata tabata cu lama tabata bruto na costa. Baby Beach, Eagle Beach, por ehempel, a haya olanan basta halto y lama a subi tera tambe causando daño na algun infrastructura.

            Piscadonan a haci nan trabao di saca nan boto fo'i lama pa asina evita cualkier daño.

            Biento tambe a wordo afecta for di dialuna anochi ya cu a sinti cu esaki a cambia di un tiki di direccion. Ora no tin biento mas cu claro ta cuminsa sinti e efecto di calor.

            Wowo di horcan Beryl a pasa banda di 2 pm panort di Aruba sin registro di awacero cu por tabata tin consecuencianan.

            Awor ta keda monitor e efectonan cu e rabo di Beryl lo por trece cu ne awe diaranson. Ta conoci cu mayoria biaha e rabo ta esun cu por causa dañonan y cu por trece cu ne algun awacero torencial of local.

            Crisis Management Office a emiti su ultimo raport di e situacion diadomingo atardi. Te cu diamars atardi no tabata tin ningun actualisacion.

            Meteo Aruba, den nan boletin di tempo di 5:30 pm, diamars a indica cu: Horcan Major Beryl ta pasando den area di Caribe y lo trece humedad abundante den region local. Esaki lo por produci algun awacero cu tambe chance pa lamper cu strena. localmente awacero por ta fuerte y causa molester. 

Condicionnan maritimo/ estado di lama: na partinan protehi di costa: keto, rond di 1 pia. na partinan zuid: modera te localmente bruto, entre 3 pa 5 te 6 pia den resake. Na partinan oost te noordwest di costa: poco bruto te bruto cu olanan alrededor di 5 pa 7 pia. Debi na proximidad di Horcan Beryl olanan por yega 8 pia y localmente 9 te 10 pia na e partinan di costa aki den resake. 

Aviso/ alerta: un advertencia pa no subi lama na partinan oost te noordwest lo ta na vigor pa botonan chikito te proximo aviso. Pa e partinan zuid ta pidi pa bay cu cautela ya cu resake modera por hasi e partinan aki localmente poco bruto. Esaki ta conta tambe pa usuarionan di lama y landadonan.

            Ta pidi pa no aventura den lama mientras e advertencia aki ta na vigor. 

Tempo tropical significante: Horcan Major Beryl (cat 5) tabata situa na mas o menos 205 km zuid- zuidoost di Isla Beata, Rep. Dominicana of 680 km oost-zuidoost di Kingston Jamaica. Beryl ta move west-noordwest cu 35 km/ora. E bientonan mas fuerte rond e centro ta di 135 nudo cu ta 250 km/ora.

Potencial di awacero pa proximo 24 ora: 5 te 15 mm; localmente esaki por varia 

Pronostico di tempo pa proximo 3 dianan: parcialmente nubla cu localmente algun awacero. Biento lo ta modera; basta fuerte te fuerte den rafaga durante awacero y for di direccion oost te zuidoost.

Temperatura (grado celsius) max / min lo ta: 33 / 28.

            Horcan Beryl su intensidad a baha na categoria 4 den oranan di diamars. Awor e ta siguiendo su trayectoria rumbo pa Jamaica.