ORANJESTAD (AAN): Dialuna dia 27 di September ta wordo observa como ‘World Tourism Day’.
Na Aruba tambe, DIARIO a compronde cu Aruba Tourism Authority lo bay ta celebra esaki cu un programa cu nan ta yama ‘Leading the Way to Happiness’.
Pero nan lo haci esaki 4 dia prome, esta Diahuebs 23 di September. Esaki ta den forma di un webinar, caminda ‘Leading the Way to Happiness’ ta pone spotlight riba e ingenio di e destinacion aki, como tambe esun di varios socio di Aruba, kendenan a evoluciona y amplia nan ofrecimento y a crea productonan y experiencianan nobo y di calidad halto cu ta satisface e necesidad di bishitantenan y di poblacion local.
E webinar aki ta wordo ofreci door di ATA na invitadonan y e lo bay ta tumando lugar na forma virtual riba Diahuebs mainta.
E pandemia di Covid-19 tabatin un impacto masal riba bida social y economia di ciudadanonan rond mundo. Tanto paisnan desaroya y esnan den desaroyo, a haya golpi di esey.
E recuperacion di turismo lo bay yuda pone economianan cuminza draai bek y pusha crecimento un biaha mas. Pesey ta esencial cu e beneficionan cu esaki lo trece, lo bay wordo braza pa tur hende y na un forma husto.
World Tourism Organization (UNWTO) pesey a designa World Tourism Day 2021 como un dia pa enfoca riba “Turismo pa Crecimento Inclusivo”.
UNWTO como un agencia specializa di Nacionnan Uni specializa pa turismo responsable y sostenible, ta guiando e sector global pa recuperacion inclusive y crecimento. Nan kier pa tur parti di e sector tin algo di bisa den su futuro, incluyendo comunidadnan, minoria, hobennan, y esnan cu di otro forma lo ta riesga di keda atras.
Turismo ta un pilar reconoci di casi tur Metanan di Desaroyo Sostenible (SGD), particularmente Meta #1 (no pobreza), Meta #5 (igualdad di sexo), Meta #8 (trabao decente y crecimento economico), y Meta #10 (reduci desigualdadnan).
Corda cu e impacto di Covid-19 riba Turismo, a costa economia mundial como 4 triyon Dollar. Paisnan den desaroyo ta esnan cu mas a wordo afecta.
Mientras tanto e crisis di mas grandi den historia di Turismo ta siguiendo den su di dos aña. Entre Januari y Mei, tourist arrivals internacionalmente tabata 85% bao di nivelnan di 2019. Aunke tin un tiki subida den luna di Mei, e presencia di variantenan di Covid-19 y e continuo introduccion di restriccion ta cay pisa riba e recuperacion di viahamento internacional. Toch a nota cu turismo domestico ta sigui crece na varios parti di mundo.
Paisnan den desaroyo ta esnan cu ta sufriendo mas di e impacto di pandemia riba turismo, debi na ausencia di vacunamento masal contra Covid-19. Nan a sufri e reduccionnan di mas grandi den yegada di turista den 2020, cu ta wordo calcula di ta entre 60% y 80%.
Riba World Tourism Day, e pandemia di Covid-19 ta representa un oportunidad pa pensa bon bek atrobe riba e futuro di sector turistico. Turismo tin un habilidad unico pa ta sigur cu ningun hende ta keda atras, y ta poni asina como e Segundo Principio di e 2030 Agenda pa Desaroyo Sostenible.
