Workshop Klik y Siña di Elmar pa adultonan mayor a cuminsa na Playa y San Nicolas

ORANJESTAD (AAN): E compania NV Elmar a cuminsa cu un edicion nobo di Workshop Klik y Siña,

un iniciativa specialmente prepara pa adultonan mayor cu kier amplia nan conocemento y sinti nan mas sigur den e mundo digital.

   Esaki ta e di dos aña consecutivo cu Elmar ta organiza Workshop Klik y Siña. E idea pa e iniciativa aki a nace durante un Town Hall Meeting di Elmar na Santa Teresita Center na comienso di 2025, unda a surgi e necesidad pa brinda adultonan mayor mas apoyo pa nan por move cu mas confianza den e mundo digital.

   E workshop ta tuma luga simultaneamente na Centro di Bario Dakota y YMCA San Nicolas, unda participantenan ta sigui un programa practico durante cinco siman. Durante e sesionnan, nan ta siña, entre otro, con pa uza computer, browse riba internet, uza e aplicacionnan digital di Elmar y con pa haci pago online.

   E edicion aki lo culmina diasabra 21 di november 2026, ora cu participantenan di ambos localidad lo completa e programa y gradua di Workshop Klik y Siña.

   NV Elmar ta extende un palabra di gradicimento na Jacqueline Woodley, facilitado di e workshop, pa su dedicacion y contribucion na guia e participantenan durante e programa.

   E workshop ta forma parti di “Energia Pa Siña”, un iniciativa di Elmar cu ta reuni su esfuersonan pa sigui comparti conocemento y crea oportunidad pa siña den nos comunidad. E mundo digital ta pa tur edad!