ORANJESTAD (AAN): Women’s Club of Aruba (WCA) ta expresa un sincero agradecimento na Old Skool Bikers Aruba
p’e donacion generoso di Awg 45.000 pa sosten di nos proyecto anual di “Dress a Child”. E donacion increibel aki tin un impacto directo riba nos muchanan di menos recurso y lo distribui Awg 15.000 pa tres aña consecutivo, esta pa 2024, 2025 y 2026.
E proyecto “Dress a Child” ta un di e iniciativanan mas stima di WCA, dedica pa duna nos muchanan nan trahe esencial, specialmente pa temporada di fin di aña. Cu e sosten di Old Skool Bikers Aruba, nos por a amplia nos yudansa, garantisando cu mas mucha por celebra e temporada di fiesta cu alegria.
“Nos ta sumamente agradecido na Old Skool Bikers Aruba pa nan generosidad y nan compromiso pa logra un cambio positivo den nos comunidad”, Reina Geerman, presidente di WCA a expresa. “Nan sosten ta refleha e spirito berdadero di donacion y ta demostra con, trahando hunto, nos por mehora bida di esnan den necesidad”.
WCA tin mas di 60 aña ta haci e proyecto aki y e ta un dje proyectonan di mas grandi. Cada aña e lista di mucha ta bira mas largo y aña pa aña mester traha mas duro pa haya e fondonan necesario.
Presidente Reina a indica, cu WCA ta draai rond di donacion di comerciante, amistad, tambe tur miembro ta aporta n’e proyectonan. Pa december 2024 tabatin un forsa grandi, hunto cu e recaudamento di fondo, mas e entrada dje rifa di Old Skool, asina comision di 'Dress a Child' a logra bisti casi 400 mucha.
E entregamento oficial di e donacion a tuma luga dia 31 di januari 2025 na e clubhuis di Old Skool Bikers na Ponton, unda miembro di ambos organisacion a reuni pa e acto simbolico di entrega di e check. E donacion ta marca un compromiso di tres aña di Old Skool Bikers Aruba p’e proyecto di “Dress a Child” di WCA.
Cu esaki WCA kier a expresa su gratitud na Old Skool Bikers Aruba pa nan generosidad!
