Women’s Club of Aruba a tene conmemoracion di victimanan di AIDS

ORANJESTAD (AAN):  Riba e dia di ‘International AIDS Candlelight Memorial’ nos ta recorda tur e victimanan di HIV/AIDS.

Tur aña ta tene esaki riba e di tres diadomingo di luna di mei, door di realisa un vigilia cu ta conta cu un participacion extenso den mundo henter.

            E abreviacion AIDS ta nifica Acquired Immune Deficiency Syndrome y ta un malesa infeccioso cu e virus cu yama Human Immunodeficiency Virus (HIV) ta causa. E virus aki di HIV tin dos variante: HIV-1 y HIV-2 y tur dos por causa AIDS!

            Danki na nos profesionalnan riba tereno di salubridad cu ta trata e personanan cu ta biba cu HIV, nos ta recorda nos pashentanan, cu a sufri y lucha contra stigmatisacion den nos sociedad, ora tabata cera porta pa nan, door di ignorancia y discriminacion.

            Diasabra dia 20 di mei, durante e reunion general pa miembrecia na La Cabana, Women’s Club of Aruba (WCA) a pone hopi atencion na e ceremonia di cendemento di bela. Esaki tabata na encargo di e ultimo ex-presidente Milagros Posner. E simbolo di HIV/AIDS ta e strik cora cu nos ta mira hopi ta uza den forma di broche of corsage.

            Cuatro bela a wordo cendi pa miembronan di WCA, cu a representa tur e añanan di dedicacion pa concientisa pueblo, pero principalmente nos hubentud tocante HIV/AIDS. E belanan tabata di color preto, cora, blanco y berde y ta representa lo siguiente.

            E bela preto ta na memoria di tur esnan cu a perde nan bida door di HIV/AIDS, el a wordo cendi pa ex-presidente Diana Uchtmann.

            E bela cora ta pa conmemora tur esnan cu ta bibando cu HIV/AIDS, ex-presidente Adelaida Ponson a cende e bela aki.

            E bela blanco ta pa conmemora tur esfuerso y educacion di nos comunidad pa cu HIV/AIDS. Rita Grant, kende tabata miembro di e comision di HIV/AIDS a cende e bela cu firmesa.

            E bela berde ta simbolisa speransa. Ta spera cu pronto por tin cura y speransa, p’asina hunto por traha pa un mundo sin HIV/AIDS. Yvonne Warren, kende den pasado a traha den e comision di HIV/AIDS a cende e bela aki.

            E miembronan di WCA presente a termina e ceremonia enfocando riba e tema di 2023: “Propaga amor y solidaridad pa construi comunidadnan mas fuerte”.

Foto pa cortesia di Emperatriz Perdomo