Women’s Club of Aruba a instala directiva pa 2024-2025  

ORANJESTAD (AAN): Diasabra, dia 18 di mei ultimo, Women’s Club of Aruba (WCA) a tene un reunion general di miembrecia na La Cabana Beach Resort pa instala su directiva pa aña 2024-2025.

           E reunion aki a conta cu presencia di su miembronan, nan invitadonan y representantenan di e diferente clubnan di servicio riba nos isla.

            Durante e evento special aki, WCA a gradici e directiva saliente pa su logronan y a instala e directiva electo cu un bunita ceremonia, cu tabata tin como tema ”A Work of Art”. Cada miembro di e directiva nobo a haya como obsekio, un bunita cuadra di flor pinta na man, cu ora uni nan e ta forma un cuadra grandi. Cada pieza di e arte aki tin su mesun funcion y cualidadnan, cu ta crea un bunita obra. Di e mesun manera, e miembronan di e directiva mester traha hunto den harmonia, pa guia e membrecia pa ehecucion di proyectonan importante pa comunidad y pa club.

            E directiva di WCA pa 2024-2025 ta consisti di:

Presidente Reina Geerman, vice-presidente Roxanne Vieira, tesorera Rafaela Werleman, secretaria Milagros Posner, chairman pa Bienestar (Welfare) Mary Taylor, chairman pa Medionan Financiero (Ways & Means) Rhona Dijkhoff y chairman pa Programa & Grupo di Estudio (Program & Study Group) Suzanne Garcia.

            WCA ta gradici ex-presidente inmediato, Norma Brinkenberg, kende a dirigi e cermonia di instalacion, y ex-presidentenan Bernadette Schouten y Benita Esguerra, kendenan a planea tur e detayenan di e ceremonia aki. E miembronan ta felicita e directiva nobo, cu lo sigui lidera e club den e trabounan pa comunidad di Aruba.  

Fotonan: cortesia di Emperatriz Perdomo