Women empOwering Women Aruba cu workshop “Kick Start Your Career” dirigi na studiantenan

ORANJESTAD (AAN): Recientemente organisacion Women empOwering Women Aruba, WOW a organisa un workshop titula “Kick Start Your Career!”.

A invita studiantenan y esnan recien gradua pa participa y siña con pa prepara pa e proceso di aplica pa un trabao of stage.

            Participacion tabata completamente gratis y a enfoca riba diferente tema importante na momento di prepara pa drenta mercado laboral.  A conta cu participacion di studiantenan di Universidad di Aruba, EPI como tambe di scol secundario.

            Entre loke a siña ta e importancia di bo CV (Curriculum Vitae), con pa traha CV den Canva (un graphic design tool), e importancia di LinkedIn compara cu otro plataformanan social, preparacion y preguntanan cu ta tuma luga ora di entrevista y etiquette na trabao cu a inclui forma di bisti y forma di presenta bo mes a traves di lenguahe corporal.

            Miembronan di WOW mes a facilita e workshop aki, basa riba nan conocemento personal y e profesion cu nan ta eherce. Pa WOW e ta importante pa contribui na e preparacion y formacion di nos hobennan pa asina nan tin tur e yabi necesario den nan man pa habri e porta pa futuro den un forma exitoso.

            E obhetivo di WOW ta pa empodera hende muhe y trece hende muhenan na Aruba hunto pa “network, learn and support”. WOW ta duna su miembronan e oportunidad pa desaroya nan mes riba tereno personal, social y profesional, mientras ta crea conexion profesional y social tambe.

            Ta duna un danki na tur miembro di WOW cu a yuda haci e dia aki uno exitoso y especialmente Head of Community Empowerment Giancarla Lobbrecht y su committee como tambe Head of Communications Eliènne Krozendijk-Croes y su committee.

            WOW ta sumamente satisfecho cu e resultado y acogida di e workshop aki y kier gradici tur participante y miembro cu a contribui na e exito di “Kick Start Your Career!”.