Edwin Roos, director:
- Demanda ta aumenta mas y mas
ORANJESTAD (AAN) Señor Edwin Roos, director di Wit Gele Kruis Aruba, den entrevista cu DIARIO, a comenta cu WGK tambe tin falta di personal pa cuido. Por ehemplo, pa su departamento di wijkzorg mayoria di cliente ta adulto mayor, cu ta haya cuido na cas, y tin di nan cu ainda ta haya ayudo na su cas (famia) pero e ta birando un problema mas y mas grandi ainda. El a señala cu, pa colmo, tin mas demanda cu WGK por duna servicio na nan.
“No obstante, mescos cu den otro parti di e sector di cuido aki, WGK tin falta di personal pa duna e servicio cu tin demanda p’e. E t’asina aki cu apenas un cupo habri e ta yena di biaha pero, lamentablemente, ora un cupo habri na Wijkzorg ta pasobra un cliente a fayece.
“Ora nos saca vacante nos ta haya hende cu ta solicita pa e trabao, pero e situacion ta cu, por ehemplo, pa nos peticion pa subsidio pa aña 2026 solamente pa wijkzorg cu ta duna cuido na cas nos a puntra pa 16 hende mas. E motibo ta, no solamente e demanda, pero e horario di duna servicio. Aworaki, nos por duna servicio solamente 8 ora pa dia, cinco dia pa siman, cu excepcion di ora ta trata di dunamento di medicamento; nos ta haci esey Diasabra tambe, pero bañamento, entre otro cosnan usual, cu tambe ta hopi importante di higiene di e cliente, esey nan ta solamente durante e siman, y nos kier amplia nos servicio por lo menos 16 ora pa dia, seis dia pa siman”, Roos a señala.
El a splica cu un diabierna, por ehemplo, ta hopi fastioso pa e cliente, pasobra WGK ta bay baña nan atardi 4 of 5’or pero eigenlijk desde e ora aki te pa su dialuna, si nan tin mala suerte, eynan ta keda, nan no ta wordo baña y esey ta hopi tristo.
“Pues, pa amplia e servicio nos mester mas hende, y tambe pa duna mas hende e servicio cu nan ta rekeri. E solucion ta depende di cada situacion; cada situacion ta unico. Danki Dios tin famia cu si tin e sosten, cu tin network”, Edwin Roos a señala.
El a comenta cu por ehemplo e stranhero cu a bira Arubiano, cu no tin nan famia aki na Aruba; hopi biaha, hasta nan yiunan cu a bay scol na Aruba a bay studia afo y keda afo. “Dus, esey ta e grupo cu ta urgente. Y eigenlijk, loke bo kier ta un lugar controla, un cas di cuido ban yam’e asina, den un bario, por ehemplo.
“Tabata tin un proyecto den pasado, cu ta traha un bario den cual tin un cas cu un post di nurse, por ta hasta un docter cu ta pasa tres biaha pa siman, aunke e hendenan ta bira independiente e cuido ta cerca, vooral, pa e grupo cu mester cuido of atencion, diariamente. Pero esey ta naturaleza. Asina cu bo edad ta avanza bo demanda pa cuido ta crece”, Edwin Roos director di WGK a subraya.
