BOGOTA: Apenas algun dia despues cu Gobierno di Venezuela a duna autorizacion pa por cuminza bula bek cu vuelonan regular for di Colombia,
despues di mas di dos aña di paro, e compania Wingo a transforma su mes den e prome aerolinea colombiano cu a anuncia fechanan pa reanuda nan vuelonan pa Venezuela.
Na comienzo, nan a bisa cu entrante Diamars 4 di October, Wingo lo bolbe uni Bogota cu Caracas cu cuatro vuelo pa siman. Bendemento di pasashi pa e ruta aki lo cuminza e dianan venidero, despues cu autoridadnan aeronautica ta aproba e itinerarionan.
Pero e compania lo bay lanza dos ruta nobo tambe, esta Medellin-Caracas entrante 18 di October, y tambe Bogota-Valencia entrante 3 di November, y tur esaki tambe ta sperando autorizacion di gobierno Venezolano, mirando cu Aerocivil Colombia si ya caba a duna luz berde pa nan.
Como cu e ta un di e mercadonan di Sur America mas importante, cu na aña 2017 tabatin hasta 17 vuelo pa dia, e ruta di Colombia-Venezuela a cay na djis 30 vuelo semanal na comienzo di 2020 cu aerolineanan Laser, Albatros, Conviasa, Avior, y Wingo.
Siman pasa, Avianca y Latam a bisa tambe cu nan ta planea pa bolbe cuminza bula pa Venezuela, unavez cu nan haya e permisonan necesario.
