Wikipedia on Aruba ta celebra 20 aña di Papiamento/u riba plataforma digital

ORANJESTAD (AAN):  Diahuebs 26 di maart, tabata un dia special pa celebra: 20 aña di presencia di idioma Papiamento/u riba Wikipedia.

E ocasion a wordo marca cu un evento significativo organisa pa Wikipedia on Aruba na Departamento Arubiana-Caribiana, situa na Bachstraat 5.

Durante e actividad, esnan presente a disfruta di un programa varia y educativo cu diferente presentacion interesante. Fundacion Lanta Papiamento, representa pa su miembro honorario, linguista Ramon Todd Dandaré, a comparti un charla cortico pero profundo riba e reglanan di oro y uzo di ortografia di Papiamento etimologico, enfatizando e importancia di un uzo corecto di idioma.

Ademas, Zetsia Ponson, hefe di Departamento Arubiana-Caribiana, hunto cu su colega Ichmarah Kock di Departamento Coleccion Digital, a elabora riba e trabao crucial cu Biblioteca Nacional Aruba ta haci pa proteha herencia cultural. Nan a destaca documentonan original, escritura historico y produccionnan digital cu ta forma parti di e memoria colectivo, cu un enfoke special riba coleccionnan na Papiamento.

E anochi a sigui cu un presentacion educativo di UNESCO Aruba. Sra. Ray-Anne Hernandez a subraya e importancia di lenganan chikito tin presencia online tambe, algo esencial pa nan sobrevivencia y desaroyo den un mundo cada bes mas digitalisa.

Pa cera e programa, Ginelly Quandt y Ricardo Arends, representantenan di Wikipedia on Aruba, a papia riba PAP-Wikipedia y su rol activo den comunidad digital, cu enfoke riba promocion y fortalecimento di uzo di idioma Papiamento online.

E evento a wordo conclui cu un dialogo interactivo entre esnan presente, creando un ambiente di intercambio di idea y reflexion.

Wikipedia on Aruba merece hopi pabien pa e logro aki. Mientrastanto, comunidad ta wordo anima pa keda pendiente, pasobra lo tin mas actividad pa sigui celebra y honra nos dushi idioma Papiamento.