ORANJESTAD (AAN): Organizacion Mundial di Salud (WHO), cu luna pasa a pidi paisnan mas avanza den vacunacion contra Covid-19 pa no cuminsa administra un di tres vacuna prome cu fin di September,
a extende nan peticion pa esaki tuma lugar te cu fin di aña, considerando desigualdad di distribucion di dosis den e planeta.
”Tin poco cambio den situacion global, y pesey mi ta pidi extende e moratoria hasta por lo menos fin di aña aki, pa permiti cu tur pais por vacuna por lo menos 40 % di nan poblacion”, director general di WHO, Tedros Adhanom Ghebreyesus a indica den un conferencia di prensa.
Aunke el a admiti cu algun grupo den riesgo por haya dosis di refuerzo contra COVID-19, “pa awo nos no kier un uso extenso di e vacunanan aki entre e poblacion completamente vacuna”, e experto a insisti.
E director di WHO a lamenta cu distribucion di e vacuna ainda ta desigual y el a asegura cu, “hopi hende cu ta muriendo no mester yega na e extremo” (un promedio di 50.000 persona pa siman den ultimo aña) debi cu “apesar cu ta existi solucionnan pa para transmision y salba bidanan, nos no ta compartiendo esaki”.
Tedros tambe a keha cu paisnan desaroya “a priminti haci un prometido di donacion di mas di mil miyon di dosis, pero solamente un 15 % di e promesanan a materializa”, y di mescos cu farmaceuticanan a bisa cu nan lo duna prioridad na programa di distribucion di vacunanan COVAX pero no a haci esaki.
”Nos no kier promesanan, nos kier vacunanan”, Tedros a declara, kende a bisa cu e ta “den shock” despues cu federacion internacional di farmaceutica a bisa cu awo cu paisnan rico a vacuna mayoria di nan poblacion ta momento cu por cambia e foco na un distribucion mas grandi na paisnan di desaroyo.
”WHO a pidi pa un distribucion husto desde principio, no den momentonan cu paisnan mas rico a completa nan vacunacion”, a subraya, y a priminti “ no keda keto ora compania y gobiernonan cu ta controla cadena di suministro global ta kere cu nos ta bay keda conforme cu restonan”.
Tedros a insisti cu e pandemia ta actualmente den un fase di dos velocidad, cu solamente paisnan rico y den desaroyo a logra contene contagio y morto (aunke e prome a aumenta, e di dos a baha).
Den e paisnan aki, el a adverti, ainda ta existi e riesgo di un “relahamento prematuro di medidanan di prevencion pone den peliger e poblacion no vacuna”, mientras cu paisnan mas pober, cifranan di morto pa Covid-10 ta hopi halto.
”Nos a scucha e excusanan di companianan di farmaceutico y paisnan rico cu economianan mas pober no por maneha cantidadnan grandi di dosis, pero casi tur tin hopi experiencia den vacunacionnan riba gran escala” contra otro malesanan, Tedros a enfatiza.
