Pabien na tur cunukero di Aruba: --- ORANJESTAD (AAN) — Awe, Dia 9 di September, ta wordo celebra e Dia Internacional di Agricultura,
un di e actividadnan mas antiguo pa subsistencia di e humanidad. Un actividad di gran importancia pa e desaroyo sostenible di e sustento di tur nacion.
Nacionnan Uni ta reconoce muy specialmente, e esfuerzo cu e productornan agricola, chikito y mediano, cu a dedica na e cultivo di tera pa produccion di alimentonan di calidad pa e poblacion, no obstante tur e dificultadnan genera durante e pandemia di Covid-19.
E fecha aki tin e meta di divulga e retonan cu e sector agricola na mundo tin cu enfrenta pa diversidad di problema, manera e cambio climatico den nos planeta, entre otro factornan ambiental, ademas di e formanan nobo di consumo.
Tambe tin e meta pa promove e estudio, desaroyo y innovacion di e agricultura y su impacto den e medio ambient, na beneficio di e generacionnan futuro.
Kico nos ta conoce como agricultura?
Ta wordo conoci como agricultura, e conhunto di actividadnan relaciona cu e cultivo di e tera y e tratamento di e suela, atravez di e intervencion di e ser humano (cunukero) pa e produccion y obtencion di alimento, manera berdura, vegetal, hortaliza, fruta, cereal, tuberculo y grano pa e consumo humano; tambe di fibra manera lino y catuna cu ta e materia prima pa traha tela pa confeccion di prendanan pa bisti; tambe e produccion di gras, semia, etc., pa alimenta e ganado, ave di cura y domestico. Importante tambe e cultivo energetico manera maishi y soya, utiliza den e produccion di bio-combustible; y no mester lubida e productonan kimico manera ethanol, plastic, almidon y sucu, y e productonan bio-farmaceutico.
Actualmente, den varios pais ta wordo uza tecnicanan innovative aplica na e tecnologia pa e labrado y cultivo di e tera, y tambe pa efectua e controlnan pertinente pa un miho calidad di productonan agricola.
Cual ta e origen di agricultura?
Tin indicacion cu e actividadnan agricola a origina nan mes durante e periodo neolitico, como un evoluciona di e actividadnan di recoleccion, caza y pesca. Esaki a keda evidencia cu e prome cultivonan di trigo y cebada, como labornan efectua door di e famianan mes pa nan propio sustento.
Ya den e Edad Media a cuminza aplica algun innovacion, mediante formanan nobo di produccion, aumentando e cosechanan y e variedad di productonan agricola.
Actualmente, e sector agricola ta dispone di makinaria y tecnologia di punta pa facilita e labornan di labranza, cultivo, cosecha, aumentando considerablemente e nivelnan di produccion y calidad di su productonan, pa satisface asina e necesidadnan di consumo di e famianan, na nivel mundial. No obstante e circumstancianan meymey di covid-19, e sector di agricultura ta sigui haci su maximo esfuerzo pa cumpli cu e expectativanan di e consumidor mundial, cu ta depende di dje.
