Cu mundo den e resultado di un menasa di un Guera Mundial --- *Cu 126 colaborador menos a baha salarionan cu casi 9 Miyon --- *Biahe y transportacion y promocion 1 Miyon menos cu na 2017
ORANJESTAD(AAN)- Na 2017 Aruba tabata un pais, cu no tabata conoce su rumbo economico manera den tur rapport oficial a bini dilanti.
E fracaso di e proyecto Citgo, cu mester a bira e bara magico pa situacion financiero, economico y social di e pais, a hinca Aruba den un situacion di rehen cu mester a kibra mientras tabata atende e situacion financiero desastroso cu a causa cantidad di medida.
Mientras Pueblo mester a acepta un pakete di medida, Prome Ministro Wever Evelyn Wever-Croes tabata tin e deber di drecha e situacion cuminsando cu e gastonan di Gobierno mes.
Na 2020 e pandemia di Covid-19 a deshaci di entrada di Aruba, cu sin reserva financiero pero un debe nacional grandi, no por a tene su mes na e cifranan cu el a planea originalmente pa 2020 y mester a haya mas sosten financiero di Hulanda.
2021 mester a marca entrada di un normal nobo, pero Covid-19 a conoce otro ola y Aruba a cay den un situacion sumamente dificil cu a exigi mas di Gobierno, cu na 2022 mester dirigi Aruba den un crisis mundial, cu menasa di un tercer guera mundial.
Den e situacion aki e maneho financiero ta mas importante cu nunca.
Ayera DIARIO a ricibi di Prome Ministro Wever-Croes e relato anual di e Ministerio di Asuntonan General, cu cual e ta encarga. E cifranan pa 2021, por wordo considera un logro financiero historico, cu mester ta modelo con ta baha gasto cu Pueblo mester paga.
E relato anual di Ministerio di Asuntonan General cu ta na encargo di Prome Ministro Wever-Croes, ta mustra con e gastonan cu Aruba tabata tin na 2017 a wordo baha na forma drastico.
Ministerio di Asuntonan General ta wordo dirigi dor di Prome Ministro, cu na 2021 a wordo confronta cu situacionnan serio.
For di 2020 a sufri resultadonan di cinco ola di Covid-19 cu tabata un menasa directo pa bida di hende y a deshaci di economia cu ta percura pa bienestar di hende.
Un resultado mas grandi riba tur tereno a wordo crea pa e Pueblo di Aruba cu mester a wordo vacuna na 2021 a base di un plan total pa atende cu e pandemia cu a kibra tur normalidad di comunidad.
Instabilidad politico a afecta Aruba cu caida di Gobierno, manera e rapport ta trece dilanti na momento cu ainda mester a haci gastonan importante cu asistencia financiero di diferente forma pa confronta Covid-19.
Den e situacion aki mester a percura pa cera porta pa mas importacion di Covid-19 y mester a planifica migracion y mantene e portanan di Venezuela cera.
Den cuadro di eleccion Gobierno mester a paga pa dos caso den Corte despues cu AVP no kier a acepta cambionan pa loke ta trata registro di votonan cu ta wordo entrega na partidonan politico y tambe a base di e exigencianan pa reconteo di voto.
Na 2021 a forma un Gobierno nobo mientras cu mester a sigui cumpli cu e exigencianan di creacion di un base nobo a base di e Plan pa Desaroyo Sostenibel di Nacionnan Uni pa mehora e calidad di bida na 2030.
Den e situacion cu a presenta su mes na 2021, Prome Ministro Wever-Croes a logra baha e gastonan di Ministerio di Asuntonan General compara cu 2017 tempo di Prome Ministro Mike Eman.
Cifranan concreto ta mustra cu na na 2021, Prome Ministro Wever-Croes a baha e gastonan di e Ministerio di Asuntonan General cu 84 porciento, pues un suma di casi 9 Miyon, dor di reduci e cantidad di personal cu 126 persona.
Gastonan di transportacion y promicion a baha cu mas cu Un Miyon compara cu 2017 prome cu cambio di Gobierno.
Pa Aruba e maneho financiero di e pais a bira sumamente importante na momento cu un situacion mundial peligroso ta presenta su mes y Aruba mescos cu henter mundo ta topa cu un situacion sumamente serio riba tereno financiero manera DIARIO a prepara Aruba.
