Na Augustus 2021 ya Parlamento tabata tin motibo pa investiga --- *Gerencia di WEB mester a consulta cu Gobierno riba prijs di awa --- *Prijs di awa ta parti di e maneho fundamental di Evelyn Wever-Croes
ORANJESTAD (AAN) — Kico ta pasando atrobe na WEB, cu ta encarga cu dos di e asuntonan mas importante pa Pueblo di Aruba cu ta awa y coriente?
Esaki ta e pregunta mas importante pa cual Pueblo di Aruba mester haya un contesta riba e termino mas cortico posibel.
No ta awor, pero basta tempo cu por papia di situacionnan cu mester wordo aclarea na WEB, cu na 2021 ya tabata den centro di noticia cu a haci cu DIARIO a pidi un investigacion di parti di Parlamento pa asina Pueblo haya contesta riba preguntanan serio cu a presenta.
E desaroyonan na WEB tabata uno di e investigacionnan profundo cu DIARIO a realisa durante ultimo añanan y cu a duna suficiente motibo pa investigacion debi na e preguntanan serio cu a wordo lansa y ta afecta directamente awa y coriente, cu ta asuntonan basico pa bienestar di henter Aruba pero tambe ta uno di e parametronan di calidad di bida di ciudadanonan.
Awa limpi y coriente, ta wordo considera internacionalmente como base pa un comunidad cu un nivel di bida aceptabel.
Sinembargo, investigacionnan cu DIARIO a realisa a mustra con for di basta tempo por papia di situacionnan serio ora atende cu WEB, manera tabata e caso cu introduccion di gas cu a bira un disputa politico ora Gobierno Evelyn Wever-Croes a introduci Eagle, mientras for di 2017 representantenan di gobierno Mike Eman hunto cu Gasunie di Hulanda tabata atende cu e asunto aki na un forma cu a exigi DIARIO pidi un investigacion parlamentario.
DIARIO na 2021 a publica e lista di salarionan cu ta wordo paga na WEB, cu no solamente a nenga di honra e acuerdo cu Prome Ministro Evelyn Wever-Croes a alcansa cu Hulanda y cu mester tabata aplicabel pa tur compania di Gobierno, pero a bay mas leu.
E gerencia di WEB a introduci un loke DIARIO a yama regalo pa trahadornan den cual den e tempo cu mester a baha tur gasto manera Hulanda a exigi, gerencia di WEB a yega na un acuerdo cu trahadornan pa 2.5 Miyon extra.
DIARIO awe ta reproduci e salarionan di trahadornan di WEB pa un periodo largo di tempo den cual Pueblo di Aruba a ricibi e prueba conWEB lo a bira un mina di oro pa pagonan cu lo a bay sigur na e parti di personal cu e salarionan mas halto, loke lo a percura tambe pa prijs di awa subi y asina Pueblo di Aruba lo a paga mas na gastonan di produccion di awa a base di e aumento di salarionan di personal di WEB y sigur e aumento di gastonan di personal pa e parti di personal cu salarionan mas halto.
E peso di prijs di awa pa Pueblo tabata un parti fundamental di e maneho cu Prome Ministro Evelyn Wever-Croes a hiba y cu el a defende a todo costo.
Informantenan di DIARIO na e nivel mas halto ta mustra cu loke a pasa ta insolito den un democracia, caminda e compania di awa y electricidad a dicidi, sin ningun consulta cu Gobierno di Aruba, a dicidi riba su mes, cu den e situacion sumamente dificil pa Aruba, ta subi e prijs di awa, loke imediatamente a haci cu e persona di Prome Ministro Wever-Croes a wordo confronta cu sugerencianan politico di gruponan den comunidad.
DIARIO for di 2021 a duna prueba di e situacion serio na WEB y e forma cu kier a aumenta salarionan, contra cual Prome Ministro Evelyn Wever-Croes a bay.
DIARIO lo sigui atende cu e caso aki pa asina informa Aruba debidamente di loke segun informantenan mester habri caminda pa yega na un Encuesta Parlamentario pa determina kico ta pasa riba tereno di produccion di awa na Aruba cu ta wordo produci dor di un compania di Pueblo di Aruba y no un compania priva.
Informantenan ta sigui insisti cu mester bini un encuesta parlamentario riba desaroyonan den WEB y den cual mester bini dilanti si Prome Ministro Evelyn Wever-Croes a rementa un mina di oro na WEB!
