'Western Wetlands Project' lo brinda un solucion pa e maneho di desperdicio di awa di riool

Minister Ursell Arends

ORANJESTAD (AAN): For di basta tempo a bin ta comunica cu nos isla tin reto grandi pa resolve, entre otro e renobacion sumamente necesario di nos planta RWZI na Bubali.  

   Tumando na cuenta e daño cu e awa sushi na Bubali Plas ta ocasionando nos flora y fauna, specialmente nos bida marino den e area, a bini cu e proposicion pa mehora e capacidad pa trata e awa, y tambe expande e wetlands pa asina tin un filter biologico mas amplio, asina conoci como e “Western Wetlands Project”.   

   Alabes ta reconoce e gran potencial pa actividad economico den e plan aki di Western Wetlands. Den e proceso di crea un eco-sistema mas vibrante, tin potencial pa haci e proyecto aki parti di nos producto turistico, pues sigurando su factibilidad.  

   Minister Arends ta pone prioridad pa crea harmonia entre nos naturalesa y nos unico pilar economico. Pa es motibo e Ministerio di Naturalesa, Fundacion Parke Nacional Aruba y Aruba Birdlife Conservation a cuminsa un iniciativa pa busca fondo pa haci e proyecto un realidad. 

   Diabierna 26 di Augustus a reuni cu e bestuur di e Tourism Product Enhancement Fund, conhuntamente cu Minister di Turismo, Sr. Dangui Oduber, pa asina cuminsa fiha e posibilidad cu TPEF por contribui na e proyecto, asina dunando esaki un kick-start.  

E cinco saliñanan pabou ta: 

Saliña Bubali 

Saliña Palm Beach 

Saliña Cerca 

Saliña Malmok 

Saliña Druif 

   Minister Arends ta spera cu pronto por mira e proyecto aki bira realidad. E no solamente lo brinda un solucion pa e maneho di desperdicio di awa di riool, pero tambe lo crea un eco-sistema vibrante caminda ambos naturalesa y ciudadanonan por goza di dje.