E-manipulacion di Mike Eman ta otro berguenza riba su lista di fracaso
- Number riba lista ta relaciona na preferencia partido na representante
- Con prome candidato pa Parlamento no por representa AVP na debate?
ORANJESTAD (AAN) Loke Mike Eman a logra den su carera politico sigur ta marca historia politico na Aruba, pero na un forma cu mayoria di hende, lo no desea pa nan wordo recorda.
Mike ta e prome y unico Prome Ministro den historia di Aruba, cu Reino a duna orden pa baha for di su escondite na Fort Zoutman, caminda el a uza un huelga di hamber pa e no confronta e hecho cu Reino a aplica Statuut pa exigi su persona cumpli cu su responsabilidad y no destrui Aruba mas cu el a haci te na e momentonan cu Hulanda a interveni.
Mike a gana eleccion na 2009 pasobra e ta kita BBO y te awe Aruba tin BBO despues cu Mike publicamente a admiti cu no por kita BBO sin hinca Aruba den problema.
Ora sigui e historial di Mike Eman, ta yega na e conclusion cu realmente Mike Eman ta un berguensa pa votadornan den e historia politico di Aruba y Mike a bay contra tur loke hasta e prome lidernan di su partido di cual e ta considera su mes heredero, a considera como asuntonan di honor di un gobernante.
Un historia sumamente tristo a wordo skirbi dor di Mike Eman, cu na 2017 mester a huy y perde for di bista di mundo politico di Aruba, despues cu el a comberti e confianza cu gran mayoria di Aruba a pone den su persona na 2013, den e derota di autonomia di e pais cu a cay bou supervision financiero di Reino.
For di 2017 Aruba no a tende mas di Mike te na momento cu Covid-19 a bati na porta y Mike a bula drenta partido AVP atrobe como lider.
Sin duda el a pensa cu Covid-19 lo a habri porta pa e por a bolbe goza di e puesto di Prome Ministro di Aruba, pais cu mester a soporta palabranan fuerte di Reino, despues cu e ciudadanonan di Aruba manera leon a lucha pa porvenir autonomo di nan pais.
Kico ta democracia a haya den partido AVP un contenido nobo na man di Mike Eman, cu continuamente ta duna prueba di no loke ta E-commerce pero loke ta E-manipulacion.
Na caminda pa eleccion 2024 Mike Eman a bolbe entrega prueba di su prioridad politico cu ta wega, cu solamente aparentemente e tin e capacidad pa fabrica como representante di Arubianonan cu pa gran mayoria no ta biba den un Penthouse manera Mike, pero si ta tene nan mes na balornan sagrado.
Cu algo tabata completamente robez den seno di AVP, cu dos participante importante cu a bandona e neishi berde, tabata mas cu visto despues cu Mike cu a reemplaza delincuente Benny Sevinger cu su yiu for di Hulanda riba lista, ainda no por a entrega un lista pa participa na eleccion.
Finalmente a bini un lista cu Mike Eman como ultimo riba lista y e hoben Wendrik Cicilia cu a wordo uza como number uno riba e lista, cu segun Mike Eman no ta haci e hoben pues e lider di Partido.
Francamente cualkier persona cu realmente ta pone grandeza politico na prome lugar, despues di e wega di Mike Eman, lo a dicidi cu e no ta bay ni ultimo ni prome riba lista mas.
Pero e number uno riba lista di AVP a dicidi cu e ta keda na su lugar.
Camara di Comercio ta tene uno di e debatenan mas prestigioso di Aruba y den esaki ta nenga di acepta Cecilia como participante di AVP y Mike Eman ta uni na otro numbernan 1 di otro partidonan pa e papia pa AVP.
Kico esaki ta nifica? Number 1 di un lista ta e persona cu un partido ta cualifica como e prome persona mas capaz pa representa e partido den gobernacion den Parlamento of Gobierno.
Si Camara di Comercio ta considera cu e no ta cualifica pa ta e participante na un debate, con por exigi pa Pueblo acepte como Miembro di Parlamento di Aruba, pues como persona cu ta dicidi pa Pueblo di Aruba den Parlamento di Aruba?
Mike Eman a pone cara di Aruba na berguenza ora el a wordo baha for di Fort Zoutman. Mike Eman a laga cara di Aruba na berguensa cu atraccion di Citgo di Nicolas Maduro, na momento cu mundo tabata cera porta pa Nicolas Maduro.
Mike Eman a exigi pa Benny Sevinger keda representante oficial di e Arubiano den Parlamento cu un salario como tal te awe.
Mike Eman a destrui su propio partido cu awe segun informacionnan a bira un partido chikito.
Tempo a acepta e partido como grandi, Mike Eman tabata lider. Awor cu el a perde atrobe hasta su candidatonan, Mike Eman ta pone otro number uno.
Si AVP haya un voto, e voto ta bay pa Wendrick Cecilia na prome lugar a menos cu Mike por humilia Wendrick Cecilia te na e punto, cu Mike na ultimo lugar ta haya mas voto cu number uno riba su lista.
Eleccion ta habri porta pa Mike Eman ta den noticia atrobe, Mike ta percura pa e haya atencion. Lastima cu te awe ora Mike haya atencion, imagen di Aruba bolbe sufri y e trata pa Aruba atrobe bira payaso di figuranan manera Nicolas Maduro!
