Cinco aña despues di e atake di Covid-19 un Aruba renoba ta vota
- Reino a presenta e formula electoral di bienestar pa futuro di Aruba
- Politiconan ehemplar di MEP a destaca den Parlamento y Gobierno
ORANJESTAD (AAN) Na e momento cu partidonan politico ta presenta nan mes na Aruba den campaña electoral, mundo ta recorda cu ta cinco aña pasa, cu bida di tur hende cu ta biba na Planeta Tera a wordo confronta cu e amenaza di morto dor di un virus cu a haya e nomber di Covid-19, cu a destrui tur normalidad na mundo.
Economia mundial, fuente di entrada di poblacion mundial, a wordo paraliza y silencia.
Panico tabata e factor cu a domina y a exigi capacidad total di gobernantenan pa enfrenta e pandemia.
Aruba como destinacion turistico, a mira loke ta su pan riba mesa, cu ta su turismo, completamente silencia.
Bista di Aruba tabata dirigi riba e persona di mr. Evelyn Wever-Croes cu a drenta den accion na scapa bida di Arubianonan na momento cu mester a atende cu Reino con ta duna continuacion na e economia y bida social di Aruba, cu tabata ya den crisis financiero grandi, debi na e debe enorme cu Gobierno Mike Eman a laga atras pa Aruba.
Prestamo di Reino tabata necesario pa Aruba a adapta su mes na situacionnan nobo.
Na Juni 2021, Aruba a bolbe urna electoral y a dicidi cu e kier continuacion di Gobierno dirigi pa mr. Evelyn Wever-Croes, cu a logra forma e coalicion MEP y RAIZ.
Pueblo di Aruba a skirbi historia cu e forma cu el a duna su confianza na Prome Ministro Evelyn Wever-Croes como Presidente di e Gobierno ehecutivo di Aruba cu a enfrenta futuro di Aruba cu paso firme.
Imediatamente despues di e pandemia, mundo a conoce e amenaza di un recesion economico, cu pa Aruba tabata nifica otro peligro grandi pa e sector di turismo y asina pa e continuacion di e recuperacion economico di Aruba.
Pero e team dirigi pa Prome Ministro Evelyn Wever-Croes a sigui cana cu paso dirigi.
Aruba na e momentonan mas dificil a conoce dirigentenan tremendo cada uno riba nan tereno pero sigur a destaca Ministro di Asuntonan Financiero, mr. Xiomara Maduro cu a scapa Florin di Aruba y a entrega finalmente na Aruba un situacion financiero, cu segun Reino Hulandes mester ta base pa trabou den futuro.
Ministro Dangui Oduber, encarga cu Turismo y Salud Publico, a duna ehempel na futuro dirigentenan cu su logro pa porfin percura pa e patient pariba di brug, por conta cu asistencia medico interno.
Logronan enorme a wordo skirbi riba tereno di Salud Publico na Aruba y e Hospital cu tabata e problema serio di ultimo añanan a conoce un cambio total di maneho.
E otro miembronan di e Gabinete Wever-Croes sigur a duna aporte valioso y sin mas mester duna merito na Ministro di Husticia y Asuntonan Social Rocco Tjong, cu e forma cu el a atende cu e dos Ministerionan cu hopi bez den asuntonan di gobernacion no ta haya atencion debido.
Medidanan cu el a tuma riba nivel social cu hasta ta topa cu resultado di e maneho di Husticia, a habri portanan nobo pa futuro.
Aruba ta prepara pa bay eleccion pa dicidi directamente kende lo ta su representantenan den Parlamento na e momento cu problemanan serio ta culmina rond mundo y ta exigi seriedad y entrega maximo na e trabou.
Ta den e cuadro aki sigur ta necesario pa presenta ehempelnan di personanan cu a duna contenido na e lugar excepcional cu Parlamento ta ocupa na un pais democratico.
Na hopi ocasion DIARIO a critica e forma con Parlamento tabata wordo reduci den su balor. E forma cu mr. Edgard Vrolijk a hiba su maneho como Presidente di Parlamento sigur ta motibo pa expresa e speranza cu eleccion 2024 ta entrega na su persona e posibilidad pa e sigui ocupa e puesto di Presidente di Parlamento.
Ta cu admiracion nos ta sigui e forma cu sigur e Miembro di fraccion di MEP, Setty Christiaans Yarzagaray, a haci su trabou den representacion di Pueblo na un forma honesto cu sigur a bini dilanti na tratamento di asuntonan sumamente serio.
Aruba ta prepara pa bay urna electoral. Aruba ta bay dicidi pa su destino, cu ta depende di e forma cu politiconan cu wordo eligi duna contenido na e exigencianan di democracia.
Ta a base di e trabou cu politiconan activo den Parlamento y den Gobierno ta haci nan trabou, Aruba ta conoce progreso of problema.
Periodismo tin a tarea grandi pa a base di leynan cu ta goberna e pais, reglanan na cual gobernantenan y Miembro di Parlamento mester tene nan mes, duna Pueblo e informacion corecto necesario, pa Pueblo dicidi pa futuro di e pais.
Na e momentonan aki nos ta sostene e punto di bista di Gobierno di Reino Hulandes, cu e maneho cu a wordo hiba na Aruba durante ultimo cuatro aña, tin continuacion cu liderazgo firme na bienestar di e Pueblo di Aruba, cu periodismo mester sirbi a base di Leynan, cu ta dicidi con un pais mester wordo goberna!
