ORANJESTAD (AAN) — Hamas Aruba por a pensa cu despues di un lucha intenso di henter e pais pa sobrevivi e pio crisis cu el a conece, e lo a confronta un desaster y berguensa
manera actualmente ta e caso.
Na e momentonan aki Aruba mester ta prepara pa su recuperacion economico, financiero y social, despues cu temporada di gobernacion di Mike Eman a hinca Aruba den un caos financiero nunca bisto.
Cifranan ta papia di e abuso cu Gobierno Mike Eman a haci cu Aruba y e cortinanan di huma cu el a uza pa asina keda na poder mientras e tabata destrui Aruba.
E siman aki ta cera cu un saldo doloroso pa Aruba, cu ta prepara pa bay urna electoral pa scoge gobernantenan cu mester sigui guia Aruba.
Awe nos mester puntra Mike Eman ta ki tipo di guia e por duna Aruba, despues cu el a duna prueba di loke e ta capaz pa haci.
Awe berdad ta sali na cla. Berdad pa cual DIARIO a adverti Aruba for di 2018 ora uno tras otro nos a presenta rapportnan cu tabata indica con Aruba a wordo destrui na su man.
Pero ainda no ta basta pa Mike Eman, cu a pone Aruba na berguensa ora Reino a yega na 2014 pa pone un fin na loke Mike Eman a haci cu placa di Aruba.
Mike Eman a horca Aruba financieramente na decisionnan cu ni un mucha lo a tuma pero Mike Eman y su ekipo di hende sabi si a tuma y a destrui Aruba.
No tabata basta cu el a kibra financia di Aruba.
Citgo tabata prueba no solamente di bofon pero tambe di e mentalidad di dictador di un homber cu a kere cu e por ta imagen di gobernante di Aruba, cu awe ta tapa cara di berguensa pa loke Mike Eman y su gobierno a logra haci.
Kende por a kere cu awe un lista di candidato cu sospechoso di caso criminal, por a wordo deposita na Conseho Electoral di Aruba?
Awe wega ta rementa den e cara di Mike Eman, cu bon bacha a bay arma un scandal dilanti Parlamento y a pone e honestidad di Conseho Electoral di Aruba, e aparato independiente, na disputa cu acusacion di fraude electoral.
E Conseho Electoral cu ta e organo independiente cu segun Ley ta wordo nombra dor di e Colegionan mas halto di Aruba, a wordo desprestigia dor di Mike Eman cu manera DIARIO a adverti tabata trata di crea un cortina di huma.
Awe Aruba ta confronta un fin di siman di berguensa. Un sospechoso ta riba lista di candidato di Aruba despues di un siman cu Mike kier a destrui bon nomber di Conseho Electoral di e pais.
E mascarada di Mike Eman a cay na final di un termino cu el a bay sconde pa no asumi su responsabilidad den Parlamento.
Pasobra unico cos cu Mike a demostra di ta capaz pa haci ta, sconde. Ora Hulanda a yega na 2014 el a bay sconde. Ora el a laga un Aruba manca pa su abuso financiero atras, el a bay sconde.
E siman aki el a arma su cortina di huma pa bolbe sconde, pero awor si berdad ta rementa den su cara cu su lista di candidato cu un sospechoso den un caso cu ta culmina den man di Husticia!
