Guardacosta ta recorda
ORANJESTAD (AAN): E siman aki, dirigentenan di Guardacosta di Caribe Hulandes a concientisa pueblo di Aruba y particularmente usarionan di lama, riba leynan vigente ariba uso di harpun.
Na november 2020 Gobierno di Aruba a introduci un asina yama ‘gedoogbeleid’ cual ta haci e uso di un harpun den lama legal. Sinembargo esaki ta mara na diferente condicion cu e usario mester tene su mes na dje.
Un suplica ta bay pa e usuarionan studia e condicionnan aki bon pa por compronde kico ta permiti ora ta pisca cu harpun.
Den caso cu un di e condicionnan aki worde viola, e ‘gedoogbeleid’ lo no ta na vigor mas y e ambtenaar di Guardacosta of Polis por actua a base di e ley existente (landsbesluit verboden onderwaterjachtmiddelen).
Guardacosta kier a pone enfasis cu den e zonanan corra manera indica riba e mapa aki no ta permiti pa tira pisca y tampoco no ta permiti pa ta den posesion di un harpun. Unico excepcion pa posesion di harpun den areanan corra ta si e harpun ta poni den un boto pa asina por sali pa bay den areanan permiti of drenta back.
Un persona no por sali for di canto di lama y landa cu su harpun den man pa asina e bay den e area cu ta permiti, vise versa tampoco no ta permiti.
Pues cu otro palabra no por pasa landa den area prohibi cu harpun den man pa yega tera.
Guardacosta ta tuma nota cu ainda tiramento di pisca ta tuma lugar sin cu tin un permiso pa esaki. Den diferente ocacion Guardacosta a actua debidamente riba esaki tambe. Piscadornan cu kier haya un permiso pa pisca cu harpun por bishita Sta. Rosa pa ricibi tur informacion tocante un permiso.
Guardacosta ta informa cu personanan cu ta mantene nan mes debidamente na tur e reglanan manera stipula den e ‘gedoogbeleid’ lo no haya nan mes den un situacion unda cu autoridad lo mester actua contra nan.
