Un aña prome cu eleccion Aruba ta wordo pusha den abismo estatal
*Condena pa Huez, Benny no por participa na investigacion Parlamentario
ORANJESTAD (AAN) — Bon maneho di Aruba, cu a bira ehempel pa paisnan grandi, a haci cu Aruba awe ta den un ehempel di bon gobernacion pa hende mundo, loke ta na interes di tur cu ta forma parti di Aruba pero sigur ta un problema serio pa openentenan di Gobierno di Aruba.
Na e momentonan aki, Aruba cu un dia a lucha cu alma y curpa pa su Status Aparte, mester haci uzo di e cuadro di Ley cu ta base di democracia y unico solucion pa saca Aruba for di turbulencia serio, cu mentenan destructor pero hambra pa poder y loke poder por produci pa nan, a crea.
Parlamento di Aruba ta e instituto prome yama, pa a base di Ley investiga loke ta pasa actualmente.
E originadornan di e intentonan pa pusha Aruba den un abismo estatal, mester wordo descubri y mester wordo presenta na Pueblo pa loke nan ta, despues di investigacionnan profundo pa medio di procesonan describi den Ley pa cada parti di Trias Politica, e tres podernan cu ta uni den gobernacion democratico di Aruba y a wordo pusha den un situacion nunca visto den historia di Aruba.
E wega cu a wordo hunga cu un check bieu di Ministro Glenbert Croes, cu tabata parti di documentonan cu Ministerio Publico a bay cune den un investigacion entorno permisonan, ta pusha Ministerio Publico y asina Husticia, hunto cu Parlamento di Aruba caminda accion politico ta wordo anuncia pa bay contra gobernacion, y finalmente Gobernacion di Aruba, den un situacion sumamente serio, cu resultadonan sumamente peligroso pa e Estado di Derecho di Aruba.
Pa Aruba por bandona e situacion actual, mester haci uzo di armanan legal cu Parlamento, Husticia y Ministronan tin den nan man pa realiza investigacionnan limpi y den cual no por tin duda di ningun persona.
Den e cuadro aki, e tras alanan di Trias Politica mester bolbe directamente na nan base legal y Ministerio Publico como aparato investigativo mester duna inicio na un investigacion interno pa mira con e documento cu a bandona oficina di Ministro Glenbert Croes, a resulta den man di publico pa wordo uza aparentemente pa wega politico.
Gobierno di Aruba mester investiga su aparato y Parlamento di Aruba mester duna inicio na e investigacionnan hancra den Ley pa asina splica Pueblo con e sistema hudicial di Aruba a wordo uza aparentemente.
Pa Parlamento di Aruba por haci uzo di e diferente formanan di investigacion cu e tin na su alcance, na prome lugar e mester actua den su propio seno.
Na e momentonan aki tin indicacion cu actonan ilegal a tuma lugar dor di personanan desconoci cu ta dispone di e armanan necesario pa documentonan bieu di un Ministro cay den man di publico y crea impresion politico.
Pa Parlamento por actua, e mester recupera loke el a perde durante ultimo tempo cu ta su prestigio como arma di Pueblo di Aruba y mester respeta e decision di Huez cu Benny Sevinger no por ta den Parlamento mientras el a wordo sentencia pa prison dor di Huez.
Parlamento di Aruba na e momentonan aki mester cuminza cu e accion di limpieza cu e accion cu e cheque bieu di Ministro Glenbert Croes ta exigi, y mayoria mester exigi pa Benny Sevinger bandona Parlamento di Aruba y no participa na investigacionnan den cual loke ta parce crimen, en todo caso, accion contra Ley mester wordo investiga.
Ministerio Publico tin na su encargo splica Pueblo kico a pasa y kico ta e medidanan cu el a tuma den e situacion aki mientras cu Gobierno di Aruba mester entrega tur informacion necesario pa normalidad na Aruba regresa.
Pa por papia di normalidad pues, mester bolbe directamente na e prome exigencia di democracia, cu ta exigi pa na e momentonan aki, Benny Sevinger condena na prison, no forma parti di e investigacionnan cu Parlamento mester realiza den un situacion cu por wordo considera como atentado contra dignidad di Pueblo di Aruba!
