Cu cantidad di politico den exterior y den porta di vacacion Parlamento
*Cheque di 2017 di Glenbert Croes a haya un rabo sorprendente
*Parlamento, Gobierno y Husticia mester duna splicacion na Pueblo
ORANJESTAD (AAN) — E reunion di Miembronan di Parlamentonan di Reino, a haci cu cantidad di Miembro di Parlamento di Aruba ta ausente pa asina nan por asisti na e encuentronan.
Na mes momento, Aruba ta yega e momento cu Parlamento di Aruba lo bay cu vacacion grandi, manera tur aña ta e caso.
Ta den e situacion aki Aruba a wordo informa cu Landsrecherche a realiza inval na entre otro oficinanan di DIMAS y di Ministro Glenbert Croes di Labor, Energia y Integracion.
E entradanan a causa accion cu por a spera cerca oposicion den mundo politico di Aruba, pero tabata tin resultado mucho mas grandi, despues cu a resulta cu un cheque confisca dor di Dimas, a resulta riba caya.
Informantenan di DIARIO a splica, cu di parti di Glenbert Croes tur cooperacion a wordo brinda na e investigacionnan di Dimas, cu lo tabata busca documentacionnan di e periodo 2020 pa 2022 a base di permisonan di estadia cu lo a wordo duna.
Informacionnan tocante e invalnan a wordo publica, pero ademas di e euforia di parti di oponentenan politico di Gobierno actual, un situacion mas serio a surgi.
Di un forma of otro un cheque di 2017, cu a wordo confisca tambe durante Inval, a resulta den man di personanan cu no tin ningun relacion cu autoridad pero mas bien a haci uzo di esaki pa hunga politica riba medionan social manera Facebook.
DIARIO a tuma nota di ehempelnan di publicacionnan riba Facebook y ta mishi cu e nomber di Glenbert Croes como Ministro.
Con por ta posibel cu material cu a wordo confisca durante Inval a resulta riba Facebook no ta conoci pero aparentemente por spera investigacion profundo den esaki.
Mas serio pa informantenan sigur ta e hecho cu uzo ta wordo haci di un cheque di 2017 di un Banco local di Aruba, na nomber di Glenbert Croes, cu en berdad a ricibi un donacion pero sigur no tabata Ministro na 2017.
Con e cheque aki a drenta publicidad pa wordo uza contra Ministro Glenbert Croes y otro miembronan di Gobierno Wever-Croes, no ta conoci.
Si ta wordo papia aki di un incidente grave ya cu Ministro Glenbert Croes, kende a introduci cambionan importante den e maneho na Dimas, ta wordo publicamente acusa cu material cu a wordo confisca durante e Inval y cu a resulta den man di publico, contra regla manera a wordo mustra.
Pa informantenan ta sumamente importante pa sali na claridad. Manera DIARIO tambe lo splica den su edicion di awe, e desaroyo aki lo mester di splicacion serio den Parlamento y di parti di Ministerio Publico, mientras el a laga hopi pregunta atras den seno di Gobierno di Aruba.
