SAN JUAN: Oficialnan di US Border Patrol y tambe Air and Marine Operations (AMO), hunto cu Forzanan Uni di Polis di Puerto Rico pa Accion Rapido (FURA),
a traha hunto pa asina confisca 2.402 kilo di cocaina den dos caso separa den fin di siman cu a pasa, na e parti zuidoost di e isla. E balor calcula di e cocaina confisca ta di como 67,5 miyon Dollar.
Tabata Dialuna 2 di Augustus cu un avion di AMO Maritime Patrol a detecta un speedboat ta nabegando direccion panort na 14 miya zuid di Vieques na Puerto Rico. Mesora a dirigi un unidad di AMO Fajardo pa vigila e boto sospechoso aki.
Finalmente na distancia di 2 miya di Vieques, e unidad di AMO a intercepta un speedboat tipo Spyder di 25 pia. Dos persona abordo a wordo aresta, y agentenan a haya 50 bola di cocaina. E peso total di e contrabanda a yega na 1.500 kilo net.
Dos dia prome, esta Diasabra 31 di Juli, agentenan di control di frontera na Ramey Station a detecta un boto sospechoso, y mesora a comunica cu un speedboat oficial di FURA Cobra pa bay intercepta. Nan a logra di localiza e boto cu a subi tera cerca di Guayanes Beach na Yabucoa na Puerto Rico.
Den e boto di 25 pia di fiberglass cu un motor di 75-HP, nan a haya 30 bola cu ta contene 750 paki di contrabando, y varios container yena cu combustible. E peso total di e contrabanda tabata 902,11 kilo.
Puerto Rico ta sigui keda vigilante, pasobra e cargamentonan aki cu nan a intercepta ta demostra cu narcotraficantenan ta buscando pa drenta Puerto Rico for di diferente skina pa trece droga. Pesey patruyahenan tanto riba lama como tambe for di aire ta sigui. Nan tin 1.800 oficial federal haciendo esaki, y tambe 240 avion y tambe 300 boto riba lama pa asina vigila tur esaki.
Homeland Security Investigation a confisca e droga y a tuma over esnan aresta pa sigui cu e investigacion y tambe hiba nan dilanti e sistema hudicial pa haya castigo.
Luna pasa, Border Patrol y FURA a confisca un cargamento di cocaina balora na 4,6 miyon Dollar cerca di Cabo Rojo, Puerto Rico.
