E fruta ta fuente di antioxidante y ta wordo usa contra griep y cacheton
ORANJESTAD (AAN): E ta un fruta cu ta crece na Aruba y hopi ciudadano ta haye fresco den nan propio hardin. Na Aruba e ta conoci como Sorsaca. Su nomber cientifico ta: “Annona muricata”. Na otro idiomanan e ta conoci como Soursop (ingles), Zuurzak (hulandes), y Guanábana (spaño). E ta un mata cu ta bin di e famia Annonaceae. E palo di mata semper ta berde, cu hopi blachi di mata y ta yega maximo 10 meter halto, y e takinan ta color di frusto y cabey riba nan. E blachinan ta oval y por haya tamaño di 7 x 20 cm. Bo por come direct, of hopi hende ta traha juice di dje, y na varios negoshi e ta wordo bendi como batido di fruta.
Sorsaca tin hopi beneficio: E componentenan activo cu tur Annonaceae ta posee ta relaciona cu un efecto riba e proceso adecuado di ‘cell apoptosis’ (ora bo curpa ta reemplaza celnan). Cu e punto di bista aki, e extractonan di diferente parti di e palo di mata di Sorsaca a wordo atribui di ta mata bacteria, ta anti-parasitico, anti-viral, anti-keintura, anti-convulsivo, y hasta evita cu ta produci presion halto di sanger.
Aki tin di agrega cu a haci estudio cu extractonan di e simia y tambe blachi di e mata, cu a demostra di tin un efecto di ta mata cancer di pulmon, cancer di pancreas, cancer di prostaat, cancer di tripa, y cancer di leukemia. Pues, e extracto di e simia y blachi por yuda elimina celnan canceroso.
Hunto cu demas moleculanan nutricional (vitamina y mineralnan) cu e matrix alimentario ta contene, nifica cu e ventahanan di e alimento aki ta simetrico cu e aporte di e grupo di berdura y fruta ta duna sernan humano en general.
Consumo di fruta: Hopi hende kier sa si consumo di e fruta aki ta yuda preveni malesanan. Hecho ta cu e componentenan bioactivo di Sorsaca a wordo studia di forma significativo pa proba su efecto contra diferente tipo di cancer. Sinembargo tin di corda cu e prevencion di malesanan ta ancra den un consumo adecuado di tur e nutrientenan rekeri tur dia den bo cuminda, un patrono optimal di hidratacion, y haci movimento frecuente di curpa.
Pero ta hopi claro cu Sorsaca por forma parti di un patronchi saludable di comemento pa un persona.
Sorsaca cu dato curioso: Na mundo tur cuminda pa nan caracteristicanan particular, semper tin lo curiosidad y un efecto specifico riba algun situacion di salud. Den caso di Sorsaca, ademas di su efecto antioxidante halto, por papia tambe cu e ta wordo usa como un hulpstof den tratamento di cacheton, griep, y algun caso di persona cu nervio of anshamento.
E ta un fruta cu bo mester consumi fresco. Normalmente hendenan ta come tambe como juice, combina cu lechi, of den postre. E ta depende di e preferencia di cada hende.
Porcion recomenda: Si bo kier haya sa e contenido nutricional, un porcion di 100 gram (cu ta igual cu 5 cuchara yen-yen), ta duna 52 kilocaloria, 1.1 gram di proteina, 0.3 gram di vet, 13 gram di carbohidrato, 278 miligram di potassium, 21 miligram di magnesium, y 25 miligram di Vitamina C.
No come su simia: Varios experto ta pone cautela, esta cu Sorsaca tin cierto regla cu bo tin di tene cuenta cune! E prome ta cu bo tin di evita di come e simia di Sorsaca. Nan ta contene componentenan toxico y por causa side-efect peligroso. Percura pa bo kita nan prome cu bo come e fruta.
Esaki lo por laga algun hende desanima. Pasobra e pruebanan cientifico haci, ta net un extracto di simia a wordo observa di ta mata cierto cel di cancer. Pero corda cu bo no por come e simia directo, pasobra e tin toxico aden.
Varios estudio a mustra cu e fruta y thee traha di e blachinan di mata, por causa e persona haya sintomanan similar cu Malesa Parkinsons.
E no ta un fruta cu bo mag di come hopi di dje! Debi cu e tin efectonan di baha bo presion di sanger, e no ta recomenda pa hendenan cu tin condicionann di hypotension. Pero tin estudio cu a indica cu Sorsaca por interactua cu remedinan di presion halto, y tambe interactua cu remedinan cu hendenan ta usa pa Diabetes. E componentenan den Sorsaca por reforza e efectonan di e remedinan aki, poniendo cu bo presion di sanger ta cay na nivel peligroso. Tambe e por pone bo nivelnan di sucu den sanger baha na un nivel abao alarmante.
Sinembargo si e consumo ta wordo haci dentro di un conducta alimentario adecua y ta respeta e porcionnan recomenda di e Sorsaca, bo por recomenda su consumo na cualkier tipo di poblacion.
Ademas di Vitamina C cu a wordo menciona na halto, Sorsaca tin tambe Vitamina B1, Vitamina B2, Vitamina B3, Folate, Calcium, Hero, Fosforo, Zinc, y Koper.
