Parlamento mester entrega Pueblo e garantia cu interes di Pueblo y Pais ta garantisa - Rapport di Refineria di Aruba ta prueba di “toko den toko” politico cu Pueblo - Pa DIARIO e loke a pasa na WEB ta prueba cu mester sigui introduci cambio
ORANJESTAD(AAN)- “Hende cu a sigui estudio avansa” ta uno di e hermentnan cu a wordo uza y malusa den politica na Aruba durante demasiado tempo.
Na 2017 prueba a wordo entrega con Aruba a bira victima di grupo elitario politico, cu na 2009 a asumi poder politico na Aruba y a cambia gobernacion den uno di e chasconan mas grandi cu e palabra gobernacion a conoce.
For di 2009 Aruba a keda den man di un grupo pretencioso, cu tabata tin mester di politica pa haya e pedestal cu aparentemente riba nan mes nan no por a logra.
E dolor di Aruba awe ta debi na e grupo cu na 2009 bou mentira y falsedad politico, a podera su mes di mando gubernamental di Aruba sin ningun preparacion.
Awe DIARIO ta papia cu prueba y mester yega na un conclusion. Si di berdad e grupo di asina yama intelectual, bou guia di Mike Eman tabata intelectual, nan a abusa di confiansa di Pueblo y pio ainda, a haci bofon di Pueblo di Aruba y di tur ciudadano.
Realidad di bida ta, cu no ta na prome momento hende ta ripara e daño cu a wordo haci na un pais. Esaki mas ainda ta un hecho, ora loke ta kibra e pais, ta bisti mascarada di solucion cu un Pueblo cu a pone fe den hende, no por mira su tras.
Kico a pasa cu Aruba na 2009? Un grupo di hende cu supuestamente ta inteligente a presenta Aruba pida keshi cu ya no tabata bon pa consumo.
Na 2017, Aruba a cuminsa mira e resultado ora ya Reino Hulandes a cuminsa actua, a impone condicionnan pa subi entrada di Aruba y pio ainda e wega di mas desastroso cu a wordo hunga cu Aruba, cu tabata Citgo, a cay for di man di poco politico sin concenshi cu a bende interes di Aruba cu Nicolas Maduro.
Pero tabata tin mucho mas. Awe rapportnan ta papia un palabra cla y poco poco Pueblo ta wordo confronta cu e realidad cruel.
Kico a pasa cu Aruba ta bini dilanti no solamente den rapportnan di Reino riba asuntonan financiero, pero sigur den e forma con e companianan di Gobierno, companianan di Pueblo di Aruba a wordo abusa dor di Gobierno Mike Eman.
E momento a yega pa Parlamento discuti e Companianan di Estado y kico ta haci pa garantisa cu Pueblo no por bira victima di abuso politico, manera sigur a socede durante gobernacion Mike Eman, cu a percura pa su voz resona den companianan caminda placa tabata lora di un Pueblo cu a wordo sacrifica pa mas y miho probecha politico durante tempo di Mike Eman.
Parlamento di Aruba tin e deber di discuti kico por pasa cu Companianan di Estado. Pa DIARIO e asunto di WEB Aruba NV no a termina. Pueblo di Aruba ta paga tur luna cobransa pa awa y coriente di un compania cu a haya oportunidad pa baha e prijs di produccion y asina e prijs pa Pueblo. Kico a socede? Pakico Eagle LNG no por a bini? Gasunie of otro compania cu mester a drenta na 2017, lo a drenta?
Na nomber di Pueblo di Aruba, DIARIO ta exigi contesta cu mester bini den Parlamento pasobra pa DIARIO ni golden ni silver handshake ta pone fin na loke a pasa.
Pakico tabata tin mester di un Financial Manager, cu a costa Aruba tanto placa? Kico e contractnan tabata bisa?
Awe Parlamento mester entrega Pueblo contesta. Parlamento mester analisa loke ta pasa den companianan di Gobierno sigur despues di loke a pasa na WEB y loke a pasa na Refineria di Aruba, un “toko den toko” den cual Mike de Meza sigur tin mas di splica Aruba pasobra ta placa di Aruba a lora den WEB y den Refineria di Aruba!
