Diahuebs y Diabierna awor
ORANJESTAD (AAN): Manera ta conoci, e proyecto di mas nobo di WEB Aruba NV na e planta pa produci coriente, ta esun conoci como ‘RECIP IV’.
WEB Aruba NV a confirma, cu relaciona cu e proyecto RECIP IV, riba Diahuebs awor 3 di Augustus, y Diabierna 4 di Augustus, ta tuma luga modificacion di e sistema di control di frecuencia (“frequency control”) den planta di generacion di coriente di WEB.
E proceso ta encera ehecucion di varios test di e reaccion di e motornan y na final un test riba e planta completo. Ta necesario sigui cu testmento pa por confirma e debido funcionamento di planta RECIP IV. Semper ta keda existi un posibilidad minimo cu por surgi interupcion di coriente mirando e magnitud y riesgonan envolvi cu e trabao.
E departamentonan di Produccion, Aplicacion y Instrumentacion di WEB en cooperacion cu partner Wärtsilä, lo tuma tur precaucion y coordina e trabao di tal forma pa evita cualkier incidente of interupcion di coriente.
