ORANJESTAD (AAN): Como aprecio pa nan tatanan cliente, WEB Aruba NV su departamento di Customer Service via su sistema automatisa di administracion di cliente a saca ‘at random’, 10 nomber di clientenan masculino.
E diez tatanan a ricibi riba Diabierna certificado di regalo pa
dos persona, hunto cu un ‘goody bag’ di WEB pa bay disfruta na un manera special riba Dia di Tata.
Den un ambiente festivo, e Team di Inspiracion y Motivacion di sector Water Distributie & Customer Service a parti e regalonan pa e 10 clientenan cu a keda masha contento cu e gesto. Tambe e tatanan a haya oportunidad di haci tur tipo di pregunta tocante WEB y asina a cuminza un amable combersacion tocante e compania, su operacionnan y nan servicionan.
E preparacion di e evento a bay cu hopi cautela. Mester a mantene e momento special aki secreto pa asina yama bonbini na e tatanan clientenan na un forma special na edificio principal di WEB. A tuma contacto cu e tatanan pa invita nan pa e evento special y nan a keda masha contento cu esaki.
Un pabien grandi ta bay pa tur nos tatanan stima di Aruba. Cu e gesto aki WEB ta aprecia nos tatanan cu semper ta traha duro pa hiba nos Aruba dilanti.
