ORANJESTAD (AAN): Tur aña un grupo di mas o menos 50 Laureat cu a ricibi un Zilveren Anjer, ta worde invita pa asisti na un presentacion di e Zilveren Anjer aki. Tin ora bo tin cu warda varios aña pa nan invita bo, pero Dufi Kock di Aruba, a ricibi e invitacion un
aña despues.
Manera menciona den DIARIO di Diaranson, dia 24 di mei ultimo, Sr. Dufi Kock, Escritor, Historiado y un Laureat, a ricibi un invitacion pa asisti na e otorgamento di e Zilveren Anjer di e aña aki. Dufi a acepta e invitacion aki mesora pa motibo cu ta un privilegio grandi cu no ta zomaar un hende por ricibi y alavez lo tey como un representante di nos pais. Dia 3 di juni nan a sali pa Hulanda pa dos siman
Diasabra ultimo Dufi y su esposa, Ija, a regresa for di Hulanda. Un biahe di dos siman cu hopi cansancio, pero hopi satisfecho di por a haya un otro oportunidad pa bishita varios ciudad bunita di Hulanda, Brussels y Alemania. A bishita misa, museo, prison y bunkernan di guera, lugarnan cu a impacta Dufi masha hopi mes. Specialmente, e prison na Breenbonk, Brussels cu durante e Di Dos Guera Mundial a detene 3,500 preso, a fusila 184, horca 23 y varios otro cu a muri door di maltrato. Anto si bo trata di huy, nan a tira bo mata sin pensa dos biaha. Un prison cu ta tuma bo mas di tres ora pa cana den e compleho pa wak tur e artefactonan di guera y tur loke tabata pasando eyden. Dufi a hasta cumpra e buki cu e storianan aki.
Dia 9 di juni, entre 11'or pa 12'or di merdia e ceremonia di otorgamento di e Zilveren Anjer a tuma luga den Palacio di Amsterdam y Prinses Beatrix a pin e Laureatnan cu e Zilveren Anjer. Dufi a asisti na e ceremonia y durante e recepcion, Dufi a bolbe haya e oportunidad pa topa cu e miembronan di Prins Bernhard Cultuurfonds y muy especial cu nos ex-Reina y awo Prinses Beatrix, pa combersa cune pa mas di mey ora.
“Prinses Beatrix tabata poco sorprendi di mira mi back asina lihe, pero hopi contento cu mi presencia. Mi a bise cu mi tey pasobra mi a aprecia y ta sinti mi masha honra e distincion cu mi a ricibi for di dje y Prins Bernhard Cultuurfonds.”
E aña aki, esnan cu a ricibi e Zilveren Anjer tabata: Trudy Riemsdijk-Zandee y Willem van Riemsdijk; Wesley Sekewael y Eel Arnolds. Sr. Riemsdijk no por tabata presente pa motibo di un kebrante di salud.
Tambe Dufi, prome cu a biaha a haya un invitacion door di su Primo, Sr. Maurits de Kort, Presidente di HOF cu tambe lo ta na Hulanda cu un delegacion consistiendo di Srs. Lex van Rooijen di Curaçao y Andre Lievaart di St. Maarten. pa un encuentro. Esaki a tuma luga na Aruba Huis dia 16 di juni, entre 9:30 - 10:30 di mainta, den presencia di nos Minister Plenipotenciario, Sr. Ady Thijsen. Despues di e encuentro Dufi a reuni cu Sr. Thijsen unda a descuti varios plan y proyecto pa Savaneta, muy especial un museo cu pa hopi aña ta den Dufi su mente y cu a worde descuti Sr. Thijsen anteriormente. Tambe durante e recoridonan, Dufi a bay sera conoci cu e Oficina di Union Europeo unda Sr. Thijsen ta tene su contactonan.
Dufi Kock ta indica cu pueblo tin di keda pendiente pa un serie di album den mi Seccion Historico cu tur informacion y potretnan di e bishita.
