WEB Aruba NV a kibra record hamas bisto cu peak di 150 MegaWatt

Riba Dialuna 5 di September 2022

ORANJESTAD (AAN): Tabata apenas dos siman pasa ora cu Aruba a pasa den e double-blackout riba Dialuna 22 di Augustus 2022, cu e compania WEB Aruba NV a divulga cu nan ta preparando pa e tradicional “peso fuerte” riba e red electrico cu nan ta conoce cada aña den e prome dos siman di September.

   E Director di WEB Aruba NV, esta Alfredo Koolman a bisa cu semper e prome dos siman ey ta hopi calor na Aruba, y esey ta demanda extra electricidad.  Y esey ta e motibo cu net e dia ey nan tabatin e Turbina di Gas for di servicio, pa  e haya su “service” prome cu September yega.

   WEB Aruba NV pues ta depende riba e Turbina di Gas pa yuda como un empuhe extra den produccion di coriente den prome dos siman di September.

   Peak a kibra record:  Y esey ta exactamente loke a socede tambe.  E compania WEB Aruba NV a divulga, cu riba Dialuna 5 di September 2022, e produccion di energia na WEB a yega na un record hamas antes bisto di 150 MW.

   Esey ta 150 MegaWatt.  Nunca antes Aruba a haya un peak di produccion asina halto.

   A ser splica na DIARIO, cu e peak promedio di produccion di energia den plantanan di WEB Aruba NV ta 135 MW, manera por mira riba e grafico aki.

   Si bay bek na historia, na September di aña 2015 e peak tabata entre 140 y 145 MW.

   Ta prome biaha den historia di produccion di energia na Aruba cu e peak ta yega 150 MW. Esaki muy probablemente ta debi na aumento di temperatura di awe y consecuentemente na un aumento den demanda di energia.

   Danki cu e Turbina di Gas ta den funcion cu el a logra yuda cu coriente no a bay na Aruba riba Dialuna 5 di September 2022.  Por tabatin algun storing chikito rond di e isla, pero esey ta cay bao di NV Elmar pa resolve.