WEB a busca un planta extra urgente di 20 MW pa coriente

WEB Aruba y compania Bredenoord a firma contract

• Pa por acomoda aumento creciente di demanda
• Generatornan di Cummins Diesel lo traha pa 2 aña 

ORANJESTAD (AAN): Riba Diabierna, e compania WEB Aruba NV y e compania hulandes Bredenoord a firma un contract pa un planta temporal di 20 MegaWatt di energia. Ta trata di un planta 'mobile' cu lo sirbi pa por cumpli cu aumento creciente di demanda pa coriente, pero tambe como back up na momento cu motornan RECIP mester haya nan mantenimento obligatorio.

   E ceremonia a tuna lugar pabao di planta di WEB caminda lo bay instala e planta 'mobile'. E planta ta encera un total di 18 container di 20 pia, cu ta contene generadornan di 850 KW y motornan marca Cummins cu lo ta den operacion na Aruba pa un period° di 2 aña.

   DIARIO a compronde cu na fin di Juli lo cuminsa e instalacion di e motornan den container y ta premira pa nan bay den servicio na Augustus venidero.

   E planta ‘mobile’ ta rekeri gasto di huur di mas o menos $5 miyon pa 2 aña y e gasto di Diesel cu ta mas di $11.5 miyon. E gastonan pa sostene e componentenan y sistemanan auxiliar pa cu e planta ta calcula na casi 6.5 miyon Florin.

   Desaroyo y Cambio Climatico: Desaroyo economico recien, hunto cu e aumento drastico di turismo y construccion, combina cu cambio rapido di clima a impone retonan nobo riba suministro di energia di Aruba. Un mision hopi importante di WEB ta pa sigura 24/7 cu comunidad y industria ta suministra cu suficiente energia di calidad. Ta WEB su compromiso pa had esaki strategicamente y a base di un Masterplan.

   Demanda peak: Durante e ceremonia di firmamento, CEO di WEB Aruba NV, Alfredo Koolman, a splica cu plannan semper mester ta basa riba proyeccionnan, cu no ta un tarea facil. Data confiabel ta un ingrediente fundamental, aparte di analisis profesional. Desde Mei 2023, a conoce un aumento enorme den demanda di energia. Basa riba dato confiabel ta anticipa mas aumento den demanda di energia awor y den e añanan benidero. Ta anticipa mas crecimento di economia (y volumen di turismo) pero tambe cambio climatico caminda temperatura lo subi y keda subi. Ta premira cu pa September y October venidero, WEB lo yega na un demanda peak 165 pa 170 MW, mientras cu na 2023 e peak tabata 155 MW.

   Mitiga demanda di energia: Como cu ainda no a amplia e parti di energia renovabel na e mix di energia, e motornan na WEB a bin ta traha overtime, creando e reto cu mientras mester produci, tambe mester saca motornan for di servicio pa nan mantenimento obligatorio.

   E proyecto pa un planta di 20 MW di energia temporal ta forma parti di WEB su plannan di termino cortico, pa tin suficiente energia disponibel durante e temporada di calor. Mientrastanto WEB a acerca consumidornan grandi di coriente pa cooperacion pa mitiga e demanda di energia.

   Riba termino mediano, WEB lo instala baterianan na Balashi pa por almacena energia, pero tambe lo expande planta existente RECIP 3 cu dos motor adicional. Riba termino largo, Aruba como nacion realmente lo tin cu materialisa e expansion renovabel urgentemente.

   Durante firmamento, por a mira presencia di Ministro Glenbert Croes tambe.