WEB a bay haci control exitoso di e ‘Glass Fused Steel Bottom Plate’ cu ta wordo fabrica na Chicago

Progreso pa e tanki moderno na Alto Vista

ORANJESTAD (AAN): Recientemente un team di WEB Aruba NV a viaha pa Merca pa asina haci un asina yama ‘site visit’ na e compania CST Industries na Chicago pa haya mas conocemento di e proceso di produccion di plachinan di staal pa e vloer cu ta bay wordo poni na e Tanki Alto Vista na Aruba.

   E team a haya un bista desde comienso di e liña di produccion di e plachinan di staal bruto precorta y di e proceso di control di calidad di e plachinan. E parti aki ta esencial pasobra aki lo prepara e superficie di e materialnan pa garantisa e rekisitonan di superficie corecto pa tapa e staal cu capa di glas (White Titanium Dioxide coating (Vitrium™).

   E team di WEB tambe a bishita e laboratorio caminda mas test ta tuma luga riba cada rol di metal cu ta drenta y riba cada lote di glas cu ta wordo produci. Tur test ta wordo haci segun normanan internacional ISO 28765. Mas aleu e team a ricibi un demostracion live di instalacion di e plachinan y e aspectonan critico di esaki. E team ta wak bek riba un site visit exitoso y a logra tur su obhetivonan. Contratista principal Florida Aqua Store y CST Industries ta haciendo nan maximo esfuerso pa gana tempo den e entrega di e plachinan pa por manda nan Aruba mas trempan cu e fecha programa.