Wardacosta di Caribe Hulandes ta sigui yena cu botonan confisca riba lama

ORANJESTAD (AAN)- Wardacosta di Caribe Hulandes, a yama un conferencia di prensa, Diamars mainta, den cual su vocero Shalick Clement, a hiba palabra.

   Clement a bisa cu e motibo pa cual a organiza e conferencia di prensa aki ta, pa duna un tiki mas di splicacion, pasobra na Juli 2022 tabata tin hopi caso cu a tuma lugar den vecindario di awanan di Aruba.

   Tin algun caso cu a cana un tiki  largo, cu nan no por a saca comunicado acerca di nan, mirando cu investigacionnan tambe mester tuma lugar.

   Den e area unda e rueda di prensa a tuma lugar tabata tin seis boto, di e casonan cu a presenta na Juli, y el a elabora tambe riba otro casonan unda no tin boto eynan, segun palabranan di  Clement.

   Clement tabata hunto cu señor Randy Paskel, Hefe di Punto di Sosten di Wardacosta di Caribe Hulandes. Refiriendo na e casonan di cual tabata envolvi e seis botonan cu el a menciona, tabata di hopi mercancia ilegal, entre otro droga unda ta papia di cocaina, y personanan indocumenta, como tambe pesca ilegal.

   E personanan indocumenta ta di diferente nacionalidad, y tur ta hende homber: Venezolano, Colombiano y Dominicano, y a detene ademas, varios hende local cu tambe ta envolvi den e transporte ilegal. Esaki tin atencion di Wardacosta di Caribe Hulandes.

   Clement a acentua cu e controlnan riba botonan local na Aruba tambe lo sigui tuma lugar, pasobra den diferente occasion Wardacosta di Caribe Hulandes ta encontra substancianan ilegal abordo y den e caso aki tambe droga. Esaki ta indica cu e trabaonan cu Wardacosta di Caribe Hulandes ta haci controlando botonan local lo tin cu sigui tuma lugar.

   Clement a describi e casonan cu a sosode den Juli, pero a cuminza cu uno cu a tuma lugar riba Diadomingo 12 di Juni, cual tabata e boto “Kayleen” unda tabata tin tres homber local unda Wardacosta di Caribe Hulandes a haya droga y arma.  DIARIO a amplia dos luna pasa extenso riba esey.

   Piscamento ilegal: Seguidamente, nan a haya nan mes cu e pesca ilegal na dos ocasion.  Esakinan tabata boto Venezolano cu nan a detecta den awanan teritorial, y esaki ta un acto ilegal pasobra personanan di afo no ta wordo permiti pa bin pisca den nos awanan.

   Piscadornan di Aruba so ta permiti pa pisca den awanan teritorial pero no un piscado Venezolano. Clement a subraya cu tin biaha nan ta bin cu netnan bastante grandi, cu tambe ta ilegal. Locual a sosode ta cu Wardacosta di Caribe Hulandes a tuma e netnan y e piscanan den beslag.