WILLEMSTAD: Wardacosta di Caribe Hulandes, hunto cu Cuerpo Policial di Curaçao, e siman aki den oranan di mainta a yuda detene algun persona indocumenta na tera.
Tur cos a cuminza ora cu Wardacosta a detecta un boto moviendo riba Marine Radar rumbo pa e parti mas pariba di Curaçao. Mesora a manda un unidad riba tera, y a laga e Helicopter di Wardacosta lanta vuelo pa bay na e area di Oostpunt. Despues cu a tende cu posiblemente e boto a yega tera, a manda Polis tambe.
Durante e buskeda, a logra haya y detene 5 persona indocumenta y a confisca alun arma di candela, y dos paki tambe cu posiblemente ta contene droga. Den oranan di merdia a bolbe laga e Helicopter, y tambe e avion Dash-8 cu su equiponan sofistica keda bula den e area pa check si por topa mas hende cu lo a yega tera, pero aki no a haya nada.
