ORANJESTAD (AAN): Manera ta conoci, riba Diahuebs otro siman, lo tin e prome Debate Politico di 2021, cu ta wordo organiza pa Camara di Comercio.
Durante un conferencia di prensa teni na KvK, e persona na cabez di e Comision di Debate na Camara di Comercio, esta Wanda Broeksema, a splica cu a pidi tur politico pa nan percura pa e debate ta uno di nivel, sin ningun insulto.
Lo bay tin tres tanda pa e prome anochi. Pero prome cu e debate mes start pa 7:00 pm, lo bay tin un “Antesala” di mey ora cu lo ta interesante pa publico mira.
Broeksema a subraya, cu e Debate ta specialmente pa publico cu ainda no sa pa ken ta vota, y via di contesta y observacion, nan por saca nan mesun conclusion, y haci nan propio escogencia via di e forma cu politiconan ta contesta e preguntanan.
Esaki lo wordo haci via e Debate cu lo consisti di 3 Tanda, unda e prome ta pregunta di publico haci riba caya, di dos ta 12 pregunta cu e comision mes a traha a base di topiconan al caso, y di tres ta pregunta cu publico por manda haci.
Pa e “Antesala” di 30 minuut, ta invita algun hende den comunidad cu por duna opinion, antesala, y informacion di politica y votamento
Ademas di esey, na final di e anochi di Debate, lo bay tin 30 minuut tambe di combersacion na final cu diferente persona conoci, cu lo bay duna nan opinion y analisis di e Debate cu a caba di finaliza.
E Debate lo pasa na Telearuba y via diferente medio di streaming local.
