Wageningen University & Research a habri e oportunidad pa Aruba por bira un ‘Brainport’ pa region

ORANJESTAD (AAN): Prome Minister Mike Eman, hunto cu Gevolmachtigde Minister di Aruba Mildred Schwengle y

representantenan di Wageningen University & Research (WUR), a reuni cu secretario di estado di Asuntonan di Reino, Eric van der Burg. E reunion a tuma luga na Ministerio di Binnenlandse Zaken en Koninkrijksrelaties na Den Haag.E reunion a concentra riba e posibilidadnan pa establece un centro di conocimiento di WUR na Aruba, cu lo contribui na investigacion, enseñansa y diversificacion di economia Arubano.

Prof. Dr. Joost de Laat, director general di Social Sciences Groupdi WUR y miembro di Wageningen Management Board, a califica e conversacion como hopi positivo.De Laat a splica cu na mei di e aña aki WUR y Aruba a firma un Memorandum of Understanding (MoU), den presencia di Prome Minister Mike Eman y director general André van Lammeren. E acuerdo tin como obhetivo fortalece cooperacion den areamanera naturalesa, agricultura y turismo."Nos a caba di tene un conversacion hopi positivo cu secretario di estado Van der Burg y nos ta wak pa awor traduci e teoria den practica", De Laat a declara.

Segun e director, tanto na Aruba como na Wageningen tin entusiasmo pa e iniciativa. E conversacionnan cu a tuma luga na Den Haag a mustra tambe disposicion pa pensa hunto tocante e siguiente paso pa tuma.De Laat a expresa e speransa cu den e proximo luna lo por tuma pasoconcreto pa realisa e proyecto.El a destaca cu un centro di conocimento di WUR na Aruba por contribui na diversificacion di economia y fortalecemento di conocimento local. Alabes, e proyecto tin importancia strategico pa WUR, mirando cu e retonan di Aruba relaciona cu turismo, awa, naturalesa y diversificacion economico ta retonan cu otro partidi mundo tambe ta enfrenta.Pa WUR, Aruba por ofrece un oportunidad pa combina investigacion y enseñansa cu solucion practico, mientras cu e universidad mes por siña for di e experencia.

E iniciativa aki hasta lo por forma e base pa un futuro Brainport na Aruba, De Laat a confirma cu esey ta e obhetivo.E siguiente fase di e cooperacion lo concentra riba traduci e intencionnan di e acuerdo den paso concreto, cu pa asina finalisa di establece un centro di conocimento cu por contribui na desaroyo sostenibel di Aruba y nos region.