E lo por bira un modelo pa otro utilidadnan den Caribe
HELSINKI, Finlandia: E grupo tecnologico Wärtsilä a logra haya e contract pa construi y instala un planta di coriente di 46-MW cu ta traha cu dos diferente combustible, pa e isla di Antigua den Caribe. E order di Ingenieria, Entrega, y Construccion (EPC Order) a wordo ordena door di Antigua Power Company Limited cu ta un productor independiente di coriente. E orden a drenta den buki di Wärtsilä na Januari 2022. E planta aki lo opera primordialmente riba liquefied natural gas (LNG).
E proyecto ta combina un planta di electricidad, y un terminal di LNG-Gas, y facilidad di almacena y regasificacion. Antigua Power Company a gana e bid pa e proyecto aki riba un Destaho Publico Internacional teni pa autoridadnan di Antigua and Barbuda na nomber di Antigua Public Utilities Authority (APUA).
E proyecto di terminal di LNG-Gas ta wordo desaroya pa Eagle LNG cu sede na Merca den un partnership igual cu Antigua Power Company, y e compania di utilidad APUA lo bay ta esun cu ta cumpra e gas. E proyecto ta encera instalacion di un terminal chikito pa almacena y regasifica, cu lo suministra e gas pa e planta nobo di coriente.
E isla di Antigua and Barbuda asina a tuma e puesto lider pa uso di combustible ecologicamente sostenible pa genera coriente, y lo bay ta e prome proyecto di e tipo aki den region di Caribe banda pariba, y cu ta acopla un terminal di LNG-Gas cu un planta di coriente di Wärtsilä.
Nan ta spera cu e concepto di planta integral aki lo bay bira un modelo pa otro companianan electrico den Caribe, awor cu mas y mas gobierno ta aceptando LNG-Gas como esun principal aworaki pa reduci nivelnan di emision. Wärtsilä tin den henter Caribe, diferente planta di coriente instala (incluyendo Aruba), cu un capacidad combina di mas di 3.300 Megawatt.
Antigua ta creciendo y nan mester di mas capacidad di electricidad, y combina esey cu e hecho cu algun planta di genera coriente existente ta birando bieu y lo tin di wordo reemplaza, a dicidi pa cambia di awor caba pa dual-fuel, cu ta e mihor solucion pa e plan di energia berde.
Segun Wärtsilä Energy, e integracion di e planta nobo aki cu un terminal di LNG ta un demostracion cla y raspa cu Wärtsilä ta trece su conocemento tecnologico y experiencia pa yuda clientenan pa haci uso di combustiblenan cu ta mas sostenible pa medio ambiente.
E planta nobo lo opera cu cinco Wärtsilä 34DF dual-fuel engine, cu por traha cu sea gas y light fuel oil. E flexibilidad aki ta combina cu eficiencia halto, y nan por start rapidamente, y yega na full power dentro di 5 minuut, pa asina duna capacidad eficiente pa balanza e red di electricidad, awor cu e adopcion di energia sostenible di biento y solar ta creciendo.
Pa di tercer cuartal di 2023 e planta aki lo cuminza opera na Antigua. E decision pa usa regasified LNG via di e compania Eagle LNG, ta debi cu e ta e fossil fuel di mas limpi, y lo resulta den 40% menos produccion di carbon, y ta cumpli cu e plan di Gobierno di Antigua and Barbuda pa nan ta mas berde.
Riba e potret por mira un engine Wärtsilä 34DF cu lo wordo instala na Antigua pa produci coriente cu LNG-Gas.
