ORANJESTAD(AAN)—2022 a bira pa mundo entrada pa un futuro marca pa inseguridad.
Na un forma directo mundo mester cuminsa atende cu e realidad cu bomnan nuclear a wordo fabrica pa destrui hende y comunidad.
Dos desaroyo importante a dicidi pa calidad di bida na 2023, durante cual mundo mester a conoce recuperacion economico y
financiero solido, cu no a cristalisa.
Na momento cu Covid-19 a ataca mundo, hende a dirigi su mes riba loke ta spera despues di 2021, ora a pensa cu lo a domina e malesa.
Na 2022, vacuna contra Covid-19 a demostra di tabata un arma efectivo pa atende cu e enfermedad te awor, pero morto ta sigui cay diariamente aunke e palabra “pandemia” a wordo geschrap na hopi pais.
Recuperacion real mundo no a conoce si mester uza e parametronan economico necesario pa dicidi si mundo a supera e atake frontal di destino, cu na 2022 a entrega mundo e crisis financiero di petroleo cu a kibra poder di compra di hende na un mundo den estado di alarma pa un guera mundial.
Kico lo pasa den e futuro cercano y distante ta loke hende mes no por bisa, mientras si mester para keto na dos factor determinante di 2023, cu ta e mensahe cu a wordo manda pa mundo dor di Volodymyr Zelenskyy, e Presidente di Ukraine cu te na ultimo momento ayera a mustra pakico e no por firma un acuerdo di paz cu Rusia, cu a entrega mundo e realidad di comunismo di Vladimir Putin, e lider Ruso.
Un cara di curashi a anima mundo, cu a wordo pusha den un angustia y ta enfrenta un destino den cual e recesion na 2023 lo ta un reto grandi pa sobrevivencia internacional.\
Zelensky como Presidente di Ukraine a entrega mundo e cara real di Vladimir Putin, cu na 2023 a uni na e lista di matonnan internacional manera Adolf Hitler, cu no conoce e palabra piedad ni sentimento humano.
Crueldad di guera a presenta su mes na mundo na 2022 y ta exigi tambe pa Aruba atencion special, debi na e hecho cu uno di e aliadonan mas directo di Vladimir Putin, Nicolas Maduro, a demostra mescos cu Putin, cu e ta trapa riba democracia y dignidad di e ser humano.
Zelensky ta bini dilanti como un heroe cu a anima su Pueblo y mundo pa no entrega spada na hende sin concenshi manera e dictador di Rusia, Vladimir Putin.
2023 ta spera pa haci su entrada na un mundo cu a bira victima di poder di petroleo, e fuente di energia cu mundo mester entrega pa acepta metodonan nobo.
Salida di petroleo lo cambia poder financiero mundial pero prome cu petroleo bandona publicidad na mundo, hopi lo pasa ainda.
Ayera prijs di petroleo, cu tabata mustra na 2022 cu e por pasa 100 Dollar pa baril, a sigui baha enfrente e temor di mas medidanan financiero cu paisnan grandi a tuma cu tarifanan di interes cu resultadonan pisa.
Inseguridad pa loke lo pasa cu e prijs di petroleo y asina cu economia mundial, a sigui crece mas ainda enfrente e realudad cruel di Ukraine, caminda misilnan tabata sigui mata pa alcansa final di 2022.
Cada dia ta hiba mundo mas na un recesion, mientras ta keda confirma cu organisacionnan mundial manera Nacionnan Uni no tin ningun poder mientras nan ta sigui duna derecho di papia y practica mentira na despotanan manera Vladimir Putin y su aliadonan, pa uza plataforma internacional pa sigui plama comunismo, e morto di dignidad di hende y democracia.
