ORANJESTAD (AAN): Director di Arubus, Eddy Mohamed Director di Arubus a duna diamars atardi su banda di medaya pa loke ta e accion cu tabata tin den oranan di mainta di parti di e trahadonan.
El a manifesta cu na prome luga palabranan di despensa na tur usuario pa e inconveniencia cu por a sufri diamars.
Segun Mohamed tin hopi luna, for di 2021, bezig cu un compania priva pa traha raportnan pa Arubus. A traha riba un herarkia nobo cu
descripcion di funcionnan cu locual ningun di e trahadonan awendia no tin. Aworaki nan a haya un descripcion di funcionnan acompaña di e responsabilidad cu e funcion tin y cu esey un structura di salario.
Akinan Arubus a haci su trabao pa wak kico ta cumbini e compania y e trahado. Esaki ta un trabao bastante grandi ya cu ta conoci cu Arubus su situacion financiero ta precario, mescos cu e situacion di pais Aruba, a bisa.
E propuesta di e structura salarial nobo mester a wordo presenta na raad y esey tabata un trayectoria basta largo pa por a convence raad di e structura cu kier a implementa. Den e structura aki no tin ningun empleado di Arubus cu ta bay atras den salario. Aworaki tin 95 trahado. Ocho di nan so tin caminda pa crece. E resto a yega e top di nan schaal. Esaki ta algo cu mester tene cuenta cu ne, a remarca.
A agrega cu den e structura nobo 44 persona ta bay tin oportunidad pa sigui crece. Esaki tambe tin su costo ya cu e ta bay costa e compania mas placa.
Aki 5 aña bay dilanti, mirando cu ta bay tin vergrijzing, tin hendenan cu ta bay cu pension, e ora e gasto di personal ta bay cuminsa baha.
A haci calculacion di 10 aña largo riba con e ta bay yuda e compania baha e gasto di personal cu ta e gasto di mas halto cu tin, Mohamed a indica.
SEPPA a entrega un proposicion, a sigui bisa, cu e ta considera un documento bashi y na mesa ora di puntra SEPPA pa splica kico e documento ta nan no por a splik'e y den e structura ey, e empleado ta gana mas hopi cu e hefe, a señala.
SEPPA cu a wordo cu a wordo informa riba esey no a coregi nada y mand'e bek. Arubus toch a bay check kico esaki ta nifica pa e compania y e structura cu SEPPA a presenta lo costa extra e compania 9 miyon 60 mil florin den 10 aña.
Segun Mohamed, locual tin aworaki ta casi impagabel y ta haciendo todo por todo pa wak unda por scapa placa y pa ta financieramente mas eficiente.
E problema ta cu si nan a crea spectativanan cu no ta realistico, no por haci nada cu esey, a remarca.
